كود سبور//
قرروا المنخرطين ديال الرجاء الرياضي يديرو منح مالية باش يحفزو اللاعبين في هذه الظرفية الحاسمة والصعيبة قبل ماتش ثمن نهائي كأس العرش وربع نهائي العصبة، وهذا الشي من بعدما تبين الفشل ديال رئيس النادي عزيز البدراوي اللي عجز على صرف مستحقات اللاعبين.
وكشفت مصادر رجاوية، أن برلمان الرجاء الرياضي قرر التدخل من جديد في محاولة لإنقاد ما يمكن إغراقه، وناضو المنخرطين ديال الرجاء اتفقوا فيما بينهم وقرروا يخصصوا منح مالية للاعبين باش يحفزوهم قبل ماتش غدا مع حسنية أكادير في ثمن نهائي كأس العرش، وقبل ماتش الاهلي في ربع نهائي عصبة أبطال إفريقيا باش يحققوا التأهل في المسابقتين.
وحسب نفس المصادر، فالمبادرة بين المنخرطين ديال الرجاء الرياضي انطلقت، وبداو لفلوس كيتجمعو وكل منخرط كيعطي على حساب الإمكانيات ديالو، والحصيلة في ارتفاع للمتبرعين وكتوصل التبرعات حتى لمبلغ 20 ألف درهم لكل واحد من المنخرطين.
ومن شأن هذه المبادرة ديال منخرطي الرجاء الرياضي أنها تحرج من جديد عزيز البدراوي رئيس النادي، واللي كيزيد يتأكد من جديد أنه ما فيدوش وجميع الوعود اللي كان كيعطي قبل ما يطلع رئيس كانت غير كلام وصافي، مع العلم أن أغلب مكونات الرجاء صبحت كتطالب بالرحيل ديالو حيث غرق الفريق في أزمة مالية وتسييرية خانقة.
Laisser un commentaire