وعلاش ما نحيدوش اصلا هاد الدعم للصحافة. اللي قدر يبقى وللي مات مشية بلا رجعة. توجهات مرسوم دعم الصحافة الجديد فصالح المقاولات لكبيرة وغادي يفقر الصغيرة. كيفاش الدولة غادية تعطي دعم اكبر لمقاولات فيها اللي فاشل غير حقاش عندو “شارج” كبير

كود هناء ابو علي ///

من المتوقع تفرج وزارة الاتصال على مرسوم لدعم المقاولات الصحافية السيمانا الجاية. هاد المرسوم من خلال اللي خرج من معطيات عليه داعم للمقاولات لكبيرة اللي عندها مصاريف كثيرة واخا اهميتها فالتأثير ضعيفة.

المرسوم غادي يكون فيه دعم مباشر للمقاولات الصحافية المهيكلة واللي فيها شروط تخليها تحمل اسم مقاولة صحافية وفيها شق جديد وهو دعم للاستثمار.

بالنسبة للشق المتعلق بدعم الدولة للاستثمار غادية تقدم كل مقاولة لوزارة الاتصال مشروع ديالها بوضوح والدولة تساهم فيه. هاد شي جديد ومزيان.

المشكلة فالدعم المتعلق بالدعم حبة. هادا فيه مشاكل. تقرر حسب ما تسرب من معطيات باللي غادي يكون دعم على التكاليف. يعني ايلى عندك ليشارج طالعين غادي تقدر تاخد حتى 40 بالمائة. بالنسبة للمقاولات للي عندهم شارج قليل الدعم يقدر يوصل ل20 بالمائة.

طبعا هاد الدعم مشروط باللي خاصك تزيد الف درهم للصحافي و500 للاخرين اللي خدامين فالمقاولة الصحافية وخاص الصالير ديال الصحافي يتزاد. يقدر يوصل ل7 الاف درهم.

دابا المقاولات الصغيرة من الاحسن ليها ما تاخدش الدعم. ما عندها ما دير بيه. باش تاخدو خاصها تزيد للصحافيين وخاصها وخاصها. لفلوس اللي غتجيها قل من اللي غادي يطلع فيها فالزيادة وتبعاتها

فين المشكل. الدولة غادية تدعم لكبار. ماشي غير هادي. كاين مقاولات فالصحافة كبيرة فليشارج ديالها وبزاف ولكن تأثيرها ضعيف بزاف. كيفاش الدولة تقدر تدعم شركات فشلات تنقص ليشارج. عندها بزاف غير زايدين وما مواكباش العصر باش غدا تقدر تطبع لي جورنالات ما يشريهم حد. هادا راه ماشي لوح الما فالرملة راه فلوس الدولة كضيع. فلوس لمغاربة كتمشي. فالمقابل يقصي هاد الدعم شركات صغيرة دارت موديل باش تركز اكثر على خدماتها. تأثيرها اقوى وطبعا عندها صحافيين خدامين معاها. الاستثمار الاكبر دارتو فالصحافي ماشي فمدراء ما صالحين والو ماشي كثرمن النص اللي فيها ماشي صحافي.

الدولة خاصها تغير الية الدعم. تبدلها. فلسفة الدعم تقوية الصغار يكبرو ماشي تخلي شي ديناصورات ماشي ولاد هاد الوقت يبقاو عايشين. تعطيهم الصيروم. تصورو شي مجلات واسبوعيات حتى الصحافيين ما فراسهم بالي مازال كيطبعو وغاديين يستافدو من حصة كبيرة فالدعم بهاد المنطق

الدعم كيتعطى للمقاولات المجتهدة ماشي للمقاولات اللي ثقلات راسها فالمصاريف وحصلات وتجي يا دولة تحلي ليها المشكل.

الدعم على ليشارج خطأ خاصو يتصحح او يتحيد كاع. علاش الدولة تدعم الصحافة اصلا.

دابا كاين الاستثمار ومزيان. اللي قدم ملفو يستافد ونبقاو مع السوق مع بعض الخصوصية لخدمة الصحافة٬ ومن بعد اللي ما قدرتش يبقى فالسوق يموت. اه انا مع تموت مقاولات صحافية حقاش فشلات فتدبير امورها على تبقى تقطر ليها الدولة الصيروم.

إقرأ الخبر من مصدره