كود هناء ابو علي ///
فمقال المجلة الشهيرة “ذا ايكونوميست” على الملك وابو زعيتر والحكم ووووو… بان الكاتب نيكولا بيلمان مراسلهم فالشرق الاوسط٬ ما عارف والو على المغرب. بان ضعيف وتحركو الايديولوجية كثر من المهنة.
مقال فيه مصادر مجهولة الاسم فهاد المجلة العريقة. مقال اشارج ضد ماشي الملك بوحدو. ضد حتى الرجل اللي كيحرك وخدام. دابا هادو شافو غير المخابرات الداخلية غير الحموشي. والو الدولة فيها غير هو.
المهم هادا ماشي موضوعنا. دابا هنا نهضرو على اللي تكلمو مع المجلة ومن حقهم٬ غير هي كانت ناقصاتهم الجرأة. ناقصاهم الشجاعة. اللي قرا الموضوع يعرف باللي هدرو مع الحقوقي عبد المومني. هادا ديما كيقول للي كيآمن بيه. كيهدر على المغرب كيف كيشوفو واللي كيكون متعارض كلنا مع توجهات الدولة. ما عمرو لا تحاكم ولا تشد فقضية كتهم حرية الافكار اللي كيآمن بيها.
للي كيعرف تحليلات ومواقف عبد المومني وقرا المقال غادية تبان ليه تصريحاتو.
لملايري كريم التازي مول “ريشبوند” اللي كان بوه محتاكر السوق كثر من 40 عام حتى هو هدر فهاد المقال. لملايري اللي عندو خبرة فعالم الاحتكار من قبل عائلات فاسية بحالو او غيرها٬ كيعرف كي داير اقتصادنا. كان يهدر على الماجيدي على صحابو على طاشرونات ولاو ملايرية وهما غير واجهة لشخصيات كيعرفها مزيان. شخصيات كبيرة بزاف. باش هدر فهاد الجورنال النگليزي المعروف كان يجبد هاد المواضيع. ماشي مشكل يجبد حرية التعبير ويعاود ديك الاسطوانة اللي تقالت على رجال فالنظام قبل من الحموشي فبداية حكم محمد السادس. ديك ديال راك اليوم الحموشي ما ينتاقدو حد فالصحافة اللي ممكن تنتاقد الملك وهو اللا.
علاقتك بالصحافة كانت باش درتي بيعة وشرية خرجتي رابح فيها مع “تيل كيل”. شريتيها مع خالد الحريري وبعد اشهر بعتيها ودخلتي فليسات كاع. يعني علاقتك بالصحافة علاقة تجارية فقط. من حقك تربح من حقك تبيع وتشري ومن حقك تجبد موضوع الحريات فالمغرب. لكن المشكلة كانت فالجبن ديالك. كون غير ترجلتي وهدرتي باسمك. مناش خايف. راه ندافعو على حقك نتناقد كلشي. ولكن لبلاد محتاجة ليك ايلى كنتي كتهدر باسمك. كدافع على قناعاتك باسمك ماشي ب”رجل اعمال” او بيزنسمان او شي حاجة اخرى.
خسارة ان التازي وعبد المومني ما هدروش باسمهم وصفتهم فمقال “ذو ايكونوميست”. راه بلادكم اللي رابحة ايلى كنتو شجعان. راه الحريات والحقوق فالبلاد غادية تقدم ايلى كنتو شجعان وهدرتو وبوجهكم مكشوف. راه كلشي يحتارمكم خصمهم قبل حليفكم.
بناء دولة الحق والحريات كيبدا بناس عندهم الجرأة يقولو ما يومنون به. يعبرو على مغربهم كيف بغاو يشوفوه. ايلى كان هاد المغرب ماشي اقصائي ماشي شمولي راه غاديين تحتارمو.
طبعا هاد الشي ما كيشملش غير التازي وعبد المومني فهاد المقال٬ كيشمل كلشي حتى هادوك اللي كيهدرو من الدولة. مادام انت فالدولة وبغيتي بلادك تتقدم٬ هدر بحرية علاش مخبي بحال كريم وفؤاد وغيرهم.