واشنطن بوسط: اوروبا محتاجة الطاقة وشمس المغرب وشمال افريقيا تقدر تزود اوروبا بالطاقة

كود – واشنطن بوسط//

قال موقع” واشنطن بوسط” ان شمس شمال افريقيا تقدر تزود المنازل والشركات الأوروبية بالطاقة، بحيث القادة الأوروبيون كيفكرو فربط مشاريع الطاقة الشمسية الضخمة فشمال إفريقيا بكابلات الطاقة تحت سطح البحر باش يتهناو من الطاقة الروسية.

وأضاف أن انخفاض تكلفة الطاقة الشمسية مقابل ارتفاع تكلفة الطاقة الأحفورية مع الحرب الروسية الأوكرانيا خلات اوروبا توجه الانظار لشمال افريقيا، و خلات مشاريع الطاقة الشمسية فشمال إفريقيا اللي كتتهدف لإرسال الكهرباء لأوروبا تخضع لمناقشات نشطة.

وقال أن الوكالة الدولية للطاقة المتجددة كتقدر ان شمال إفريقيا عندها قدرة قابلة للتركيب كتوصل 2792(GW) من الطاقة الشمسية و 223 (GW)من الطاقة الريحية واللي بإمكانو يولد أكثر من ضعفي إنتاج أوروبا من الكهرباء فعام 2021.

وأشار أنه كاينة إمكانية ان مشاريع الطاقة فشمال إفريقيا تقدر تلبي ما يصل ل٪15 من الطلب على الكهرباء فأوروبا، نظرا لوفرة الأراضي الصحراوية فشمال افريقيا اللي كتساهم فتوليد هاد الطاقة اكثر من اراضي اوروبا لاسيما المغرب اللي دار فاالسنوات الأخيرة مشروع كبير للطاقة الشمسية حدا مدينة ورزازات.

الاهتمام موجه اكثر للمغرب، بحيث المغرب عندو أكبر محطة للطاقة الشمسية المركزة فالعالم وكاين خطط باش يبني محطات اخرى وأشار أن هادي فرصة للمغرب يروج لراسو كبلد عملاق للطاقة المتجددة.

وذكر الموقع أن هادي ماشي اول كتتطلع فيها أوروبا نحو الطاقة الشمسية من شمال إفريقيا ولكن كان مشروع من قبل ماكملش “ديزيرتيك” اللي كان كيهدف لتوفير حوالي ٪15 من احتياجات الطاقة فأوروبا باستثمار 436 مليار دولار فالطاقة الشمسية فالمنطقة.

وأضاف أنه كاين تحديات قدام المشروع لأن مزارع الطاقة الشمسية الكبيرة كيخصها الماء باش تخدم، وهو اللي مكاينش فالصحراء ولكن مؤيدو المشاريع كيقولو أن المشكل غيتحل إن بتوفير المياه من خلال محطات تحلية المياه اللي كتخدم بالطاقة المتجددة.

https://www.washingtonpost.com/climate-solutions/2023/04/13/morocco-europe-solar-desert/

إقرأ الخبر من مصدره