ريما. لـ – كود ///
يوم الأربعاء، صدر بيان على نقابات الصيادلة و قالو دايرين إضراب يوم الخميس لمدة أربعة و عشرين ساعة.
أنا صراحة من هادوك الناس اللي كاع ما تيقو، حيت كنسمع بإضراب الموظفين، إضراب المعطلين، إضراب المنكوبين، و لكن، ما سمعت من قبل عن إضراب أصحاب رؤوس الأموال و إضراب مول الشكارة!
نسيت…أو تناسيت الموضوع و لو على مضض، إذا بي يتصل بي صديق يوم الخميس و طلب مني نضيبانيه بشي فونتولين(رشاشة ديال الضيقة) للأخت ديالو حيت جاتها أزمة. أنا صراحة نسيت موضوع إضراب الصيادلة، و جاوبتو بتهكم و قلت ليه واش كتطنز عليا؟ سير للصيدلية أنا راني ما كنبيعش الكونطربونض. قال لي راه اليوم الخميس و الصيادلة سادين حيت دايرين إضراب. واش سادين كلهم؟ نعم سادين كلهم. أ سي فلان واش متأكد ما دارينش بيرمانونص؟ لا ما دايرينش بيرمانونص، سادين سدة دالغدايد.
الصيدلي اللي نسناو باراكتو، عايناه يداوينا. سد الحانوته و بززق لينا؟
واش حنا ما حيلتنا لحرب أوكرانيا، ولا لغلاء الطاقة و أسعار ماطيشة فرمضان، وقفنا على هادوك اللي ترجينا فيهم يبريونا، جاو هما ضلموها علينا؟
و فيناهو سمو مهنة الصيدلة؟ و فين أخلاق الدكاترة؟
أ سيدي درتو إضراب…عندكم مطالب عادلة، الحكومة ضلماتكم و زادت عليكم الضريبة و داكشي كلو عندكم فيه الحق!
إوا و المواطن مالو تحكرو عليه؟ عملتو إضراب، عملوه بضمير! فكرو فصحة مواطن الفنتولين!! فكرو فاللي غادي يمشي للمستعجلات و ممكن صيدليتكم تكون مسألة حياة أو موت بالنسبة ليه.
فتحو مجال للمواطن باش يتيق فيكم، يتعاطف معكم و ممكن حتى يساندكم فمطالبكم. على الأقل كون نضمتو البيرمانونص و درتو إضراب المهنيين المحترفين و اللي كيسهرو فعلا على صحة المواطن، ماشي اللي همهم غير فشحال غادي يدخلو فآخر الشهر و شحال غادي تنقص عليهم الحكومة ديال الضريبة و شحال غادي يزيدو فالربح.
فالدول اللتي تعنى بصحة و سلامة المواطنين، و الدكاترة فيها عندهم ضمير، راه ممنوع غلق الصيدليات بشكل قاطع. في دبي فتح الصيدلية إلزامي 24 ساعة أولا ما تختارش مهنة الصيدلة. لأن الصحة بالنسبة ليهم ما معاهاش اللعب.