سهام البارودي- كود//
واحد النهار كنت صغيرة و قلت لماما بغيت نمشي بالقفطان للمدرسة في اطار شي مناسبة دينية قالت ليا مالك غاتمشي تشطحي ؟ يعيطك عليك الاستاذ للسبورة تنوضي بتكشيطتك شنو غايقوليهم ” كانقدم ليكم الشيخة لي غاتشطح لينا اليوم ؟” من داك النهار ماعاودتش جبدت معاها موضوع اللباس التقليدي فالمدرسة ! كانو شي كسولات كايجيو بالجلابة فالليسي ولكن فعلا كايكونو غا دوك البنات لي مضوبلات ثلاتة د المرات و كاتقرا معانا حنا قد ولادها ! دوك البنات لي كاتكون اطول و اغلض و اصح من الاستاذة هي فالتاسعة و بزازلها فالباك ! كاتقرى معاك غا الدورة الاولى و الدورة الثانية ماكاتجيش كايقولو ليك راه تجوجات ! هادوك لي كانو كايلبسو الجلابة فالليسي ! أما ولاد و بنات الموظفات و العائلات القارية راه كانو كايجيو بلباس مناسب !
نايض شي صداع مؤخرا على ليسي ديكارت حيت منع شي تلميذ انه يدخل ليها بجلابة ! و من حقهم ! المدرسة راها مدرسة ماشي جامع و لا مارشي باش تمشي ليه بالجلابة ! و ماشي الختانة ديالك و لا العرس ديال بنت خالتك ! ايه الجلابة من التقاليد ديالنا و لكن راه حتى العيطة من التقاليد ديالنا واش غادي معاك كامانجة و تلعب الجرة فالقسم ؟ مايمكنش ! المدرسة و الادارة عندها الهيبة ديالها و عندها القداسة ديالها، حوايج القراية راهم باينين و حوايج المناسبات باينين !
و بلا مايبداو يتزايدو على ليسي ديكارت لاواه فرانسا ! لاواه كايمنعونا من اللباس المغربي التقليدي ! لاواه الاستعمار ! شوف آ سي ! راه مامشيتي ليسي ديكارت الا وا راك كاتموت على فرانسا و ثقافة فرانسا و قراية فرانسا و مدرسة فرانسا … فا ماكاين لاش نتزايدو على بعضياتنا ! ليسي ديكارت مدرسة فرنسية كاتحكمها الثقافة و القيم الفرنسية ! لامابغيتيهمش! و بغيتي ولدك يلبس الجلابة و بنتك تمشي للمدرسة بالتكشيطة سير قيدهم فمدرسة عائشة ام المومنين مع “ولاد الشعب” ! واخا انا بعدا كانشوف بلي اللباس التقليدي خاصو يتمنع منعا باتا من المدارس و الادارات !