محمد سقراط-كود///
دويرة صغيرة في المدن السياحية بحال مراكش طنجة اكادير فاس الرباط غادي يبان ليك أن المواطن المغربي معندوش مشكل مع الأجانب أنهم ياكلوا في رمضان حداه، كاين مطاعم حالين والسياح كالسين فالطيراسات كياكلو عادي ومغاربة كيسربيوهم في جو من الألفة والإحترام والتنوع والإختلاف، ولكن بمجرد خوه المغربي يبغي ياكل حتى هو في نهار رمضان كيتقلبوا المغاربة لدواعش مستعدين يطبقوا الحد على وكال رمضان وحتى القانون والدولة كتوقف معاهم وكتساندهم وكتعطيهم شرعية لهاد التدخل السافر في حقوق المواطن المغربي بأنه يعتاقد ويآمن بآش بغا وياكل وقت بغا، وميحتاجش يكون متماهي مع الجموع لي كتحميهم الدولة بنص قانوني باش يمارس حياتو الطبيعية بالطريقة لي كيشوفها مناسبة.
هنا غادي يبان ليك أن المغاربة معندهمش موشكيل مع وكالين رمضان الأجانب بل عندهم موشكيل أنك تكون بحالهم كتشبه ليهم وتاكل في رمضان وهوما جيعانين هنا كتفيق فيهم أبو بكر البغدادي، أما الى كنتي زعر وباسبور أجنبي خود راحتك هوما يسربيوك، ولكن الى مغربي واخا تكون مسيحي بوذي برغواطي مستخدم بموقع كود مايرحموكش وماغادي يديرو ليك حتى شي إعتبار، وهذا كيعني أنهم متسامحين مع الأجنبي كثر ملي متسامحين مع ولاد بلادهم بالإظافة إلى أن الدولة مضصرا المغاربة على بعضياتهم بهاد القوانين لي كتحد من الحريات الفردية وكتخلي الجماعة تتدخل في حياة الأفراد في كل صغيرة وكبير.
الإنسان العادي فاش كيحس براسو أنه مسنود من طرف الدولة والقانون راه كيقدر يرتاكب مجازر بحال لي دارو الألمان في الهولوكوست، طبعا في المغرب ماواصلاش الأمور لهادشي ولكن تاريخيا رته سبق للمغاربة العاديين قتلوا بعضياتهم حتى عياو، وغير في الأسواق الأسبوعية شحال من مرة كان كيتشد شفار وكيبقاو عليه بالعصا حتى يموت، أنا نيت حضرت لواحد فبني حسان نواحي الشاون بقاو عليه بالعصا حتى خلاوه شبه ميت معرفتش واش مات من بعد أو لا ولكن راه القبيلة كلها كانت كتضرب، وهادشي كيوقع بعد المرات حتى مع وكالين رمضان ومنهم لي مريض وعندو عذر شرعي وحقا هادشي وقع في حوادث منفردة ولكن كاينة وتمارس عنف شديد على الناس بحال واحد جوج شباب في عمر الزهور فشي سوق اسبوعي في الجنوب كانو كلاو مكلى الطبل نهار العيد، شنو لي يخلي الجموع تتهجم على مواطن وتحاول تقتلوا هو حماية الدولة لهاد الجموع بنص قانوني كيعاقب على اللإفطار العلني وفي نفس الوقت كيعطي فرصة للناس فين تمارس توحشها بشرعية دينية وقانونية، والدولة راه دورها تحمي المواطنين من بعضياتهم ماشي العكس.