علي الصافي – كود//
تقدر تكون من المنتقدين لاعلان المغرب الصيام و الاعياد مختلفا عن باقي الدول ولكن خاصك تعرف بلي الاعلان تيبدا بتكوين لجنة مراقبة الهلال. كاين اللجن الجهوية عددها 12 بعدد جهات المملكة و هي تتكون من افراد مختلفة مجالاتهم ، الداخلية، الاوقاف، الدرك ، العدول ، الارصاد الجوية، و حتى الجيش تيدخل فهاذ العملية.
هاذ الاجهزة كاملة يجتمعون اخر كل شهر هجري على مدار السنة و يعملون بنظام المداولة، كل شهر يجي منهم واحد مختلف باستثناء ناظر الاوقاف اللي تيكون نفسو و من بعد المراقبة وكيف ما كانت نتيجة الترائي فهاذ اللجان جهوية تزود المعلومة للجهة المركزية في مقر وزارة الاوقاف و الشؤون الاسلامية في الرباط سواء برؤية الهلال من عدمها و هاد شي على مدار اشهر السنة الهجرية.
وعكس الدول العربية والاسلامية، المغرب تيشتغل بهاذ اللجان طيلة الاشهر الهجرية للسنة و ماشي غير رمضان و شوال و ذي الحجة.. وهاذ الشي خاص وزارة الاوقاف تشرحوا وماتبقاش سادة على راسها و تخلي الناس تابعة السعودية في الإفطار ولا الصوم، هاذ لدولة اللي الفلكيين دائما تيقولو راها عندها أخطاء في مراقبة الهلال بحال ليلة الخميس اللي مكانش يمكن يتشاف الهلال، دائما حسب الفلكيين، واللي نفسهم تيقرو بلي المغرب نسبة الخطأ عندو في مراقبة الهلال منعدمة ..
Laisser un commentaire