واش بوعشرين والراضي والريسوني وزيان وناس الريف دارو اعمال اخطر من الارهابيين. علاش كاين عفو على 17 محكوم كانو بغاو يرجعو المغرب داعش ومازال ما خدا حتى واحد من الصحافيين وناشطي الحراك

كود هناء ابو علي ///

المناسبات الوطنية لكبيرة والاعياد خاصة العيد الصغير ولكبير كتكون مناسبة انتظار للي عندهم محكومين فقضايا عادية او حتى قضايا كبيرة بحال الارهاب. مؤخرا ولينا كنشوفو بيان تصدرو وزارة العدل وفيه انه بمناسبة …. اصدر الملك عفوه على…. طبعا هاد الشي كولو مادام قضية العفو ما تمش اصلاحها ومازالت بيد رئيس الدولة.

شفنا البارح كان بيان مقسم لجوجت اقسام. قسم اول فيه عفو ملكي على “مجموعة من الأشخاص منهم المعتقلين ومنهم الموجودين في حالة سراح، المحكوم عليهم من طرف مختلف محاكم المملكة الشريفة وعددهم 1518 شخصا”. استافد هاد العدد. فيه اللي فحالة اعتقال وكيمثلو الغالبية وفيهم اللي تعفى عليهم ما تبقى من الحبس وفيهم اللي تخفضات ليه العقوبة وكاين اللي تحول من المؤبد للمحدد كاع.

لكن فهاد الفئة كاينة فئة اخرى وهي اللي جات فالفقرة الثانية. فيها “وبهذه المناسبة السعيدة أبى جلالته دام له النصر والتمكين إلا أن يسبغ عفوه المولوي الكريم على مجموعة من المحكومين في قضايا التطرف والإرهاب، بعدما أعلنوا بشكل رسمي تشبثهم بثوابت الأمة ومقدساتها وبالمؤسسات الوطنية، وبعد مراجعة مواقفهم وتوجهاتهم الفكرية، ونبذهم للتطرف والإرهاب وعددهم 17 شخصا”

اييه 17 واحد كان بغى يرجع بلادنا داعش وبالدم والنار ومع ذلك خدا عفو. هادو فيهم 5 اللي خرج بلا ما يكمل العقوبة وفيهم 6 نقصو ليهم من العقوبة وفيهم اللي سمحو ليه فالغرامة.

حنا ما عارفينش اش دارو اللي خداو العفو فالفئة الاولى٬ حتى هاداك اللي كان عندو المؤبد وتحول لحبس محدد ما عرفناهش اش دار. اكيد دارو جرائم كثيرة وخايبة. للي كنعرفوه هو هادوك 17 اللي استافدو من العفو. هادو دواعش مجندين بايعو خليفتهم باش ينوضوها فالمغرب ويحرقو كلشي. هادو ومع ذلك خداو عفو. البيان كيقول باللي راجعو مواقفهم. صعيب تعرف لان عدد منهم قالو هاد الهدرة وباش بانت داعش فسوريا مشاو عند خليفتهم. شفنا شي وحدين بحال حسن الكتاني خدا عفو ومازال متطرف وخطير علي المجتمع. فين المراجعة؟ ما كايناش
المهم هادا ماشي موضوعنا. علاش هاد الشي كولو هو علاش استثناء الصحافيون توفيق بوعشرين وسليمان الريسوني وعمر الراضي من العفو. علاش استثناء شباب الحراك من هاد العفو. علاش ما كاين لا تخفيض العقوبة لا عفو ما قضي من هاد العقوبة. 

بوعشرين دوز اليوم 5 سنين وشهرين فالحبس. محكوم عليه ب15 سنة فقضية مثيرة ما عمر المنظمات الحقوقية الدولية صدقاتها تتعلق بالاتجار بالبشر. المهم دوز ثلث المدة. علاش هاد الصحافي ما استافد من والو. لا تخفيض لا عفو بما قضى لا والو. اكيد بوعشرين ما دارش جرم اكثر من هاداك اللي كان محكوم بالمؤبد ولا محدد ولا هادوك 17 ديال الارهاب ولا حتى هادوك اللي استافدو من العفو فالفئة الاولى. 
نفس الشيء ينطبق علي الصحافيين سليمان الريسوني وعمر الراضي. الاول اعتاقل فاواخر ماي 2020 اي تقريبا 3 سنوات وهو فالحبس وتحكم عليه ب5 سنين. دوز اكثر من النص. بقات ليه عامين وما استافد من حتى عفو. اما عمر الراضي فمحكوم عليه ب6 سنين بتهمتي: التخابر والاعتداء الجنسي” دوز تقريبا نصف المدة. 

نزيدو علي هادو ناصر الزفزافي وباقي نشطاء حراك الريف اللي عندهم حتى 20 عام دالحبس ومعاهم حتى محمد زيان المحامي اللي تعتاقل بلى ما يستافد حتى واحد من هادو من شي عفو.

واش هادو اللي ذكرنا قتلو شي حد او حرضو على قتل شي حد. ابدا. علاش ما يستافد حتى حد منهم من شي عفو. 

راها قضايا ماشي عادية عند المنظمات الحقوقية الدولية. عند الصحافة الدولية. عندها علاقة بحرية التعبير ماشي بالتهم اللي حوكمو بها. 
خاص هاد الصفحة تطوى. الدولة قادرة على هاد الشي. عندها الطرق والوسائل لذلك. العفو واحدة من هاد الوسائل. 

نتمناو فالعيد اللي جاي يكون شي خبار زوين نسمعو خبر عفو على الصحافيين وناشطي حراك الريف ومحمد زيان. كلهم او بعضهم. المهم تكون بداية لطي ملف هاد الفئات

إقرأ الخبر من مصدره