واش ما غادياش توقع ازمة بين الرباط وبيكين بسبابو؟ الفنان الصيني المعروف المنشق آي ويوي كيقدم ابداعاتو فمتحف بالرباط

احمد الطيب كود الرباط ///

واحد من كبار الفنانين فالعالم غادي يعرض ابداعاتو فمتحف محمد السادس للفن الحديث والمعاصر بالرباط٬ يتعلق الامر بآي ويوي. هاد لخبار جا بعد لقاء دارو اليوم بنفس المتحف مع مهدي قطبي رئيس المؤسسة الوطنية للمتاحف.

المعرض غادي يكون ف2025 كيف قال قطبي لللي اوضح فتصريح لوكالة المغرب العربي للانباء باللي كيأمل يبرز فيه الصناعة التقليدية المغربية ووسمها بطابع فني اكثر وذلك بغرض خلق اشعاع اكثر للثقافة ديالنا.

الفنان من جيهتو قال باللي هاد المعرض غادي يكون “خطوة اولى يخطوها بطموح مواصلة تقاسم أعماله مع الجمهور الإفريقي”. واوضح الفنان المقيم بالبرتغال “”أقيم حاليا في لشبونة، وأعتقد أن القرب الجغرافي يمكنني من القدوم بشكل متكرر إلى إفريقيا وإلى المغرب من أجل اكتشاف التقاليد والثقافة واللغات التي تميز القارة، وكذا من أجل توسيع معارفي بشأنها بعيدا عن الأفكار المسبقة” واكد باللي”إفريقيا توجد في صلب اهتماماتي، وأن أتمكن من عرض أعمالي بها هو حلم بالنسبة لي”.

الفنان من مواليد 1957. واحد من كبار الفنانين كيجمع التصوير والنحت والهندسة المعمارية واخا هو خريج اكاديمية السينما ببيكين.

الفنان قطع مع النظام الصيني. بدا ف2011 باش انتاقد الحكومة الصينية. تشد فالحبس ودوز 81 يوم. بعدها مشى لالمانيا قبل ما يستحق فلشبونة. ولى منشق وبقى كيهاجم هاد النظام. اخر خرجة ليه كانت بخصوص المشهد المثير لاخراج الرئيس الصيني السابق هو دجينتاو من المؤتمر الاخير للحزب الشيوعي الصيني. قال من طوكيو واصفا المشهد “كيشبه بزاف لصورة مزورة. بخصوص تصرفات قادة الحزب الحاكمين قال ليهم “حتى واحد ما تحرك. ما حرك عينو. بزز منو خرج =على الرئيس السابق= ولكن هاد الشي كيبين كبار مسيري الحكومة المركزية راهم ما فقلوبهم رحمة”

الفنان ابن شاعر صيني كبير اضاف “دولة كبيرة فيها مليار و400 مليون محكومة من جماعة ما عندهم احترام لا للقواعد. ما عندهمش عواطف لا صداقات”.

اللي وقع هو ان الرئيس الصيني الحالي خرج وسط المؤتمر وبحضور كلشي الرئيس الصيني السابق فمنظر مؤلم ما فيه حتى شي انسانية

طبعا استضافة معرض فنان بحال هادا فالمغرب غادي يقلق الحكومة الصينية. ما غاديش يعجبها الحال. معرض ديالو فالمغرب راه حدث فني كبير بزاف. معارضو كلها احداث فنية فعالم الفن وباش يوظف ما هو مغربي غادي يكون سفير لثقافتنا٬ غير خاص قادة الصين تكون عندهم روح رياضية وصافي

إقرأ الخبر من مصدره