محمد سقراط-كود///
كأس إفريقيا لي فات كنت سمعت واحد المحلل معروف في القهوة دالحومة كيقول بلي النصيري وباقي اللعابة ديال أكاديمية محمد السادس مفروضين على المنتخب واخا مكيعرفو للكورة منين يجيوها غير حيت ولاد الأكادينية وباش يتباعوا بالثمن وتبان الأكاديمية أنها ناجحة بينما في الأصل هي فاشلة وعمرها خرجات شي كوايري أو غادا تخرجوا حتى مستقبلا، وهاد الهدرة كانت رايجة عند كولشي وبقات كتدور حتى لبداية كاس العالم قطر، ومع هادشي وقع في عصر الأنترنيت راه كولشي موثق وعاقل على الهجوم لي تعرض ليه النصيري بالخصوص وكيفاش أنه أفشل مهاجم عند المغرب وأن جميع الخيارات الأخرى راه حسن منو، بلا منهدرو على أولترا حمد الله وكيفاش دوزو شهور في تمجيده وذكر محاسنه وذم النصيري في المقابل.
في اللخر النتيجة راه كلنا شفناها النصيري كان نجم في كاس العالم قطر دار داكشي لي عمرو دارو شي مهاجم مغربي، ضغط وكان عندو دور دفاعي مهم بزاف وماركا أهداف تاريخية غادي يبقاو المغاربة والعالم عاقلين عليها، وحاليا راه مكمل المسيرة العظيمة ديال مع سيفيا وغادي كيترع في الشباكي، والقيمة السوقية ديال تضوبلات والهدرة عليه في الإعلام ديما، دابا شنو الإحساس ديال هادوك لي نقصو منو وسخروا ودارو تحليلات وفيديوات فيها تهجم بشكل شخصي على النصيري وعلى الركراكي لي ختارو ، لدرجة صفحة مطاعم ماكدونالد المغرب تنمرات على النصيري وداك الهدرة ديال جوج كوشيات لي كتخرج من فم وحدين مكيعرفو حتى يقطعو الشانطي.
يوسف النصيري قصة نجاح كبيرة بزاف يستاهل يدار عليه وثائقي في نيتفليكس من عشرة حلقات أو مسسلسل في HBO أو أمير كوستاريكا يدير عليه فيلم بحال لي دار على مارادونا، لأنه شاب خرج من قناة الفالوب ديال المعاناة راه ولد وحدة من أكثر المناطق تهميشا وإجراما وفقرا في مدينة فاس لي كلها مهمشة أصلا، ومع ذلك تحدى كولشي ولعب كورة وداز من فترات صعيبة وهاجموه المغاربة تقربيا كلهم من غير عدنان احيزون ومع ذلك بقا صامد بحال شي ساموراي حتى قنع العالم عاد المغاربة أنهم أفضل مهاجم مغربي في التاريخ لذا فراه يستاهل إعتذار شعبي ورسمي من المغاربة لأنهم أساؤوا ليه بزاف وكون مكانش لعاب بشخصية وذهنية قوية راه كان يتحطم بالإنتقادات ولكنه أثبت العكس وأظهر للمغاربة وللعالم أن أكاديمية محمد السادس قادرة تخرج لعابة من الطراز العالي
Laisser un commentaire