محمد سقراط-كود///
قبل مايتشد محمد مبديع بأيام تم انتخابه من طرف 250 برلماني عاقل باش يكون على رأس لجنة العدل النيابية، البرلمانيين لي صوتو عليهم المغاربة ختارو واحد متابع بقضايا ديال الفساد باش يكون على رأس لجنة العدل، تا إينا عدل هذا والمغرب كامل عارف شكون هو مبديع والقضية باش متابع والمواقع والصحافة كتكتب تقريبا يوميا، يعني مكانتش شي حاجة خافية على الناس مابقى غير البرلمانيين لي مطالعين على أيتها حاجة من غير راه مبديع متابع بالفساد وناضو صوتوا عليه، المغاربة أصلا فاقدين الثقة في البرلمان وببحال هادشي غادي يقطعوا الأمل نهائيا، حيت لا يعقل كثر من ميتين برلماني تاواحد فيهم مانبه لخريين أو قال نعلو الشيطان يا هاد الناس راكم غادي تديرو واحد متابع بالفساد على رأي لجنة العدل، وهاهو تشذ وراه في عكاشة ومع ذلك الخبر دايز عادي يقدر يكون مهم في دوار جاخيتي فقط.
كاين بزاف ديال المغاربة غادي يتمناو يكونوا بلاصة مبديع أو الفايق في الحبس المهم هو يعيشوا العز والفلوس ويراكموا الثروة أما سنوات السجن شحال مادوزو بالنسبة ليهم قليلة، مبديع من أواخر التسعينات وهو مورك على البوطون وكان هو الملك المتوج ديال لاربعة الفقيه بنصالح هو الآمر الناهي وعاش الفلوس والبذخ ديال بصح مقابل في حالة تحكم سنوات قليلة من الحبس ويخرج يلقى العاقة باقا راه بزاف بزاف ديال المغاربة يبغيو يديرو هاد الصفقة مع الشيطان.
حيت من بداية الفساد حتى كتشد وتحكم كتدوز مدة طويلة بزاف، تكون درتي لاباس وعشتي وتفطحتي وترفحتي وترفحوا معاك صحابك وعائلتك وولادك وبعدتي على الفقر حتى حفايذك، عاد الدولة كتسيق بيك الخبار وتبغي تحاسب معاك هادشي في حالة كانت كرشك كبيرة وفيك الهدرة، أما الى كنتي درويش سكوتي وقانع راه تبقى تشفر حتى تموت مكاين لي يقوليك شحال في الساعة، مبديع الملفات لي متابع بيها من 2005 حسب بعض المواقع، قريبة لعشرين عام وهو واخض راحتو في المارشيات مكاين لي قاليه شنو كتدير أسي، حتى جات وقتو عاد طاح وبحالو بزاف في الجبال والهضاب والسهول والمدن والقرى وحتى هوما في حالة جات نوبتهم غادي تجي معطلة حتى غادي تكون ضاعت فلوس كثيرة للدولة وهي ساكتة كتفرج .
Laisser un commentaire