كود سبور//
بدا كيتحرك برلمان الرجاء الرياضي باش يوضع حد للرئيس عزيز البدراوي اللي دخل الفريق فالحيط، وآخر الكوارث ديالو الإقصاء من ربع نهائي عصبة أبطال إفريقيا لكرة القدم أمام الأهلي المصري.
وكشفت مصادر رجاوية جيدة الاطلاع لموقع “كود”، أن عدد من منخرطي الرجاء الرياضي غاضبين من إقصاء الرجاء على اليد الأهلي المصري، ومباشرة من بعدما سالا الماتش اتخذوا قرار الاطاحة بعزيز البدراوي رئيس النادي ويجريو عليه، وحسب نفس المصادر فالمنخرطين بالرجاء بداو كيوجدوا لائحة فيها الأسماء ديالهم باش يوقفوه عن ممارسة أي نشاط خاص بالنادي ويجمعو النصاب القانوني لعقد جمع عام استثنائي جديد ويجريو عليه من المنصب.
وسلطت جماهير الرجاء الرياضي غضبها الكبير على عزيز البدراوي ومعها المنخرطين بالنادي من بعد إقصاء الرجاء من عصبة أبطال إفريقيا أمام الأهلي، حيث تبين مع الوقت أن الوعود ديالو كانت غير كذوب طلع رئيس، النتيجة موسم كارثي للفريق حيث خرج من لاكورس على لقب البطولة وتقصى مع عصبة أبطال إفريقيا اللي ما غيشاركش فيها العام الجاي وموحال يشارك حتى فكأس العرش، وكيتعتبر عزيز البدراوي أسوء رئيس داو في تاريخ الرجاء.