ريما لـ – كود ///
حاجيتكم و ماجيتكم على السي بن زيدان.. اللي كان فالبرلمان و ولى أمين عام الإخوان
مرت ليام و ليام، و جاتو شي خبار من عند جماعتو فمصر و تركيا و السودان
بلي كاينة التبلبيلة و كاين فالسياسة العربية شي فيضان..
قال هادي الهوتة و أنا لمطور و الفايق و أنا حديدان…
غادي نخطب و نعطب بحلاوة اللسان… و ندير ما دار أغاميمنون من زمان…
نبداو بعدا و نقولو ليكم حكاية أغاميمنون ديال اليونان..
اللي بلمكر و الحيلة دخل لطروادة و دمر لمكان…
كانو الناس دياول طرواده و دياول اليونان.. كلهم عايشين فأمان..
و أغاميمنون ما عجبوش الهنا و الأمان.. حيت كان باغي الكل يعيش فحرمان
دار موتة حمار و تسلل لطروادة… و قالو ناسها صافي راه إنسان مزيان… حيت عطاهم لامان..
صدقوه الناس..حلو ليه الباب..ودخلوه للدار و عطاوه السوارت دالمكان…
دخل و تشعب و قلب و تشقلب و قال هادي داري و خرجو منها يا القومان..
و مشات مسكينة طروادة و بقاو يحكيو عليها الناس من داك الزمان…
ياخدو لعبرة و ما يتيقوش فلي يجي يتدحلب و يتسحب و يقول أنا اللي غادي نخرج العفاريت و الجان..
بن زيدان سمع بأغاميمنون و ناس طروادة و ناس اليونان و قال هذا الحل حتى فهاد الزمان..
و نهار جاتو خبار من هلو فلجزيرة باللي واقع فتونس و فمصر و السودان…
قال هادي لوجيبة و ندير لحيلة و حتى أنا الليلة نعطي للملك و للمغاربة لامان..
كانت الهليلة صغيرة و ردها هو كبيرة بالتهويل و التكبير و الترهيب و قال سمعو يا لمغاربة ليا و ديروني فالحكومة أنا و للإخوان
راه حنا اللي غادي نقدرو نحميوكم من الجزيرة و من غضب أردوغان… غير ديرو النية راه هادشي اللي بغات لميريكان…
قالو لو لمغاربة اللي نية طلع و عنداك ما تجيبش فالعيد الخرفان..
و المغاربة اللي فايقين و عايقين..قالو ليه طلع انت و الإخوان..
ولكن هدا باللاتي…السوارت يبقاو عند مول لبلاد اللي نتيقو فيه مزيان…
خدا الرئاسة و لقى راسو محزم بالخاوي و ماشي بالمليان..
يحكي على التماسيح و العفاريت من الإنس و الجان و يقول كاينين و كيحاربوني و غادي نحضرهم للعيان..
جاو لمغاربة قالو لو غادي نتيقوك.. و لكن عطينا لبرهان
لقا من العفاريت غير صحابو من فاطيمة النجاري و الفيزازي و الشوباني…مالين لفضايح قلالين الشان…
وصل وقت الشوار تاني و قال عافاكوم عطيوني فرصة نجيب ليكم هادوك لعفارت اللي محمقيني و مخلييني كيف العميان..
و طلع تاني و شي عفارت ما بانو و لقى راسو بوحدو و ماكاين لا جان و فلان و لا علان..
جا مول لبلاد و قالو صافي خرج من الحكومة راك خديتي فرصة و جوج و ثلاثه و راك حشمتينا مع الشعب و مع الجيران..
خرج من الحكومة و قلبو عليه صحابو الإخوان… و قالو ليه الشمايت.. حنا نبقاو و انت سير علينا بحالك راك عندك الدار و الطونوبيل و ولتي من الأعيان…
جا وقت صندوق الشوار تاني و ترعبنا لا يرجعو لينا الإخوان…يجيبو بن كيران تاني يخلي الخدمة و يحكي لينا على الجان..
ملي سقطو الشمايت فصندوق الشوار..رجعو بنكيران أمين عام تاني ديال الإخوان..و قال ليهم غير تهناو دابا نرجع نبكي و نحكي على العفاريت راه أنا حديدان…
و لكن هيهات هيهات يا رباعة أردوغان..جاو رجالات لبلاد و وقفو وقفة مع مول لبلاد و قالو عمر داود ما يعاود يا فلان..
مول لبلاد قطع و قال اللي فالدستور يبان..و اللي ختارو الشعب يطلع..و اللي خسر يمشي بحالو..دابا جا وقت الحمامة و الجرار و الميزان..
عزيز و عبد اللطيف و نزار رجال الدولة و على يديهم يبان الفاسد و الضالم و الطماع..و ها مبدع و رباعتو بانو و باقي يبان فلان و فلان.