اسماء غربي – كود//
“على مأساة، العيالات ماكيمشيوش للتيران باش يموتو” بهاد الجملة المكلخة والعامرة بالمغالطات باش بداو مؤتلف “خارجات على القانون” بوسط فصفحتهم الرسمية ف”فيسبوك” على وفاة المشجعة الرجاوية نورا نهار السبت فماتش الرجاء والاهلي المصري.
مافهمتش! علاش نهضرو بالضبط على النساء!؟ علاش مانقولوش الناس ماكتمشيش للتيران باش تموت؟ علاش ندخلو الجندر فموضوع بعيد كل البعد على هادشي؟. كيفاش؟ واش زعما بغاو يعنيو ان الرجال كايمشيو للتيران باش يموتو!؟ وهانية الراجل يموت ولكن المرا لا؟
خلاو كاع الاسباب ورا موت نورا، ومشاو لجندرها! ماهضرو لا على التنظيم ، لا على ادارة الرجاء، لا على الجمهور، لا والو. بانتلهم غير مرا! ماتت حيت مرا! واش التدافع والزحام والموت فالدخلة ديال التيران كيفرقو بين المرا والراجل؟ لا. اذا لاش نتوما كتفرقو بيناتهم؟ هادشي اللي كيوقع فاش ناس مافاهمين والو فالكونطيكسط المغربي ومشاكل عيالاتو، كيناضلو من اجل حقوق المغربيات.. داخلين للنضال بفورما “كوبيي كولي” من فرنسا! بلا حتى دراية بشنو واقع عندنا وبواحد الفيمينزم مرشوش بكره للجال ومدردر بالفرانساوية.
بهاد البوسط على موت نورا دارو بحال الاسطورة اللي كتقول ان نهار قالو لماري اونطولنيط راه الناس كتموت بالجوع ومابقالهمش الخبز، جاوباتهم: ياكلو البتيبان! السيدة منفصلة على الواقع ومافاهمة والو، وهكا “خارجات على القانون” ، خارجات على الواقع!.
حركات كدافع على المغربيات مهمة بزاف خاصة فبلاد بحال ديالنا اللي مازالة فيها المرا كتعاني من شلا حاجات، والعديد من حقوقها مهضومين. ولكن خاصنا حركات مغربية، ماشي فرانساوية، غبية، مغبرة، وديطاشي تماما من السياق المغربي والواقع ديالو. خاصنا مغربيات براگماتيك وقافزات وفاهمات كيفاش وفوقاش يدافعو علينا.
الموت ديال نورا بصح مأساة وحشومة تحاولو تركبو عليها بفيمينيزم ديال الكيلو.
Laisser un commentaire