كود سبور//
كشفت مصادر رجاوية لموقع “كود”، أن برلمان النادي بدا كيحصن راسو ضد تكرار سيناريو فاشل بحال التجربة الكارثية ديال الرئيس المستقيل عزيز البدراوي، واللي براني على النادي وماشي رجاوي وبالصدفة وضغط الجمهور طلع رئيس الفريق، وأكدت أن الجمع العام الاستثنائي لانتخاب رئيس جديد بديل له يوم 26 ماي المقبل، غيعرف تطبيق القانون الداخلي للنادي بحذافيره.
وحسب نفس المصادر، فمن بعدما راجت الهضرة حول رغبة تشرح شي وحدين برانيين على الرجاء بحال عبد الرزاق المنفلوطي الرئيس السابق للاتحاد البيضاوي، فالمنخرطين بالرجاء الرياضي ومن بينهم منخرطين وازنين وعندهم كلمتهم، قرروا بأن سيناريو البدراوي ما غاديش يتعاود واكدوا على ضرورة الالتزام بتطبيق القانون في الترشح لرئاسة النادي ومن بينها قضاء مدة عامين على الأقل كمنخرط للنادي وتكون مستوفاة.
أما بخصوص عودة الرئيس الأسبق سعيد حسبان، فوضحت المصادر، أن حتى هذه الإمكانية رافضينها المنخرطين ماشي اعتراضا على الشخص ولكن حيث فيها خرق للقانون لان حسبان ما بقاش كيخلص الانخراط ديالو مدة هذه، وبالتالي فالقانون الداخلي واضح وغيطبقوه، وهذاكشي ديال جيب شيك وخلص الانخراط لمدة عامين باش تترشح لرئاسة النادي ما غيكونش هذه المرة، واللي بغى يترشح خاصو يكون ديجا منخرط لمدة عامين على الأقل.
كانوا منخرطين الرجاء الرياضي سمحوا لعزيز البدراوي باش يطلع رئيس للنادي في شهر يونيو 2022، في خرق سافر للقانون الداخلي للنادي، باش يديرو الخاطر للجماهير اللي كانت كتطالب بالبدراوي كرئيس جديد ال خضرا من بعدما كذب عليها وأوهمها بأنه غيرجع الرجاء كتغخلع وكتربح الألقاب، ولكن حتى حاجة ما وقعت من غير أنه رجع الرجاء كتخلع فالرجاويين بكثرة الخسران اللي كتخسر والأداء الكارثي اللي كتقدم في المرحلة ديالو.
Laisser un commentaire