محمد سقراط-كود///
ناريندرا مودي الرئيس ديال الهند فاش بغى يدير شي مخطط للنهضة بالإقتصاد الهندي لقى أغلب الإقتصاد غير مهيكل ومتهرب من الضريبة وأغلب الفلوس كاينة خارج البانكات، لقى الدولة ماعرفاش الناس واش عندهم الفلوس أو لا أصلا، ناض شاف شناهي أكثر جوج عملات كيحتافظو بيها الناس هي المية والميتين روبية بحال عندنا المية والميتين درهم وبدلهم وعطا أوامر لي ماجابش فلوسو يبدلهم خلال مدة محددة راه ماغاديش يبقاو دايزين، ناضت الروينة في البلاد ماتوا شي مية غير في الزحامات على البانكات وفي ظروف أخرى، ولكن النتيجة كانت لي عندو شي ريال تحت الزلية جبدو وداه للبنكة والدولة عرفات الناس شحال عندهم ديال الفلوس ومن هادشي بدات نهضة الهند الحديثة بالإظافة الى يسهلو إجرائات الضريبة ونقصوا عرام ديال البيروقراطية لي كانت عائق كبير في النمو الإقتصادي للبلاد ولي خلاتها دابا مع الأوائل في العالم ومستقبلا تقدر تكون مع طوب تلاتة حسب حلقة إقتصاد الكوكب.
قرارات عظيمة بحال هاكة كتحتاج رؤساء وسياسيين عظيميين وعندهم الخصيتين(fبمعنى الشجاعة وماشي الرجولة وحتى السياسيات لي تاخدو قرارات عظيمة بحال مارغاريت تناتشر نقولوها عليهم)، باش مايكونوش خاضعين للشعب وللإرادة والأهواء ديالو ويدوزو فترتهم كيخافوا يقلقوا الشعب عند كل قرار أو خطوة وكيخافوا من انتفاضة الشعب، خاص يكونوا هوما كيعرفوا مصلحة الشعب حسن من راسو وهادشي ممحتاجاش شي عبقرية كبيرة ولكن محتاج شجاعة كبيرة بزاف، ومحتاج شخصية مكيخافش من الإنتقاد والنقد الآني حيت عارف المغاربة غادي يشكروه على الأمد البعيد لأنه قدر يخرج إقتصادهم من العشوائية والسلب والنهب للنظام والفعالية، المغرب لحد الآن رغم كل ما قطعه راه باقي الناتج الداخلي الخام ديالو على قد الحال هادشي لي كيخلينا واخا بلاد زينة ولكن في أواخر عدة لوائح وتصنيفات.
بعد الإغلاق ديال كورونا بزاف توقعوا أن البلاد غادا تجوع أو تنهار أو ترجع عشرسنين اللور، ولكن تاحاجة من هادشي ماوقعات بانت فلوس كثيرة كانت تحت الزليجة وشي عاون شي، ولي بغا يبيع لقى لي يشري من عندو وأيام كورونا راه البني كان خدام على الجهد واخا البيع قليل في بعض المدن ولكن مدن بحال قنيطرة وطنجة وكازا بقات عايشة وخدامة ومروجة بفضل الإقتصاد الغير مهيكل والتهرب الضريبي، جرب فقط تخلص بكارط فيزا في المغرب يالله غادي تلقاها دايزة فشي جوج مطاعم والأسواق الكبرى فقط، الأطباء الصيدليات صحاب البياس ديال الطوموبيلات صحاب مواد البناء كولشي تقريبا مكيتعاملش بلاكارط كيفضل الكاش، والكاش هو عدو الإقتصاد بالنسبة لدولة معندها حتى شي ثروة طبيعية، وهاد الثقل الضريبي كامل كيهزوه الموظفين ولي كتقطع ليهم الضريبة من المصدر أما الأعمال الحرة كيديكلاريو باش بغاو ومكاين لا متابعة لا نجاعة في التحصيل الضريبي، اذن علاش الحكومة ماتاخدش قرار جريئ بحال لي دارت الهند وتقرر تستبدل ورقتي 100 درهم و 200 درهم وهاكا غادي تعرف شحال مخبيين المغاربة تحت الزليجة وفي نفس الوقت تقدر تهيكل الإقتصاد الغير مهيكل وتطور من نجاحة الإستخلاص الضريبي لي ناجع حاليا غير مع الموظفين لي كيتقطع ليهم من المصدر.