سهام البارودي- كود//
صورة زوينة لي بانت مؤخرا من شي جامع فالمغرب كاتبان فيها مرا بلباس عصري جالسة فوق المنبر، ماعرفتش الصراحة حيثيات الصورة و ماكايهمّونيش بالقدر لي كايهمّوني الآراء ديال عباد الله لي هاجموها ! و لي عتابرو أنه حشومة المرا تجلس فوق المنبر بشعرها مطلوق !
طبعا أول المنددين و أول الحياحة غايكونو هوما المتشددين فحال الكتاني و الحدوشي لي كانو تشدّو فالاحداث د سطاش ماي الارهابية ! هادو من العادي جدا تصدر منهم هاد ردود الفعل ! علاه هوما فين عمّرهم اصلا بغاو المرا تخرج من الدار و يكون عندها صوت ! فما بالك انها تدخل للجامع و تجلس فوق المنبر و كيفاش ؟ بشعرها مطلوق ! هاي هاي هاي زعامة كبيرة هادي !
المشكل ماشي فهادو ! هادو حنا عارفينهم و عايشين معاهم و عارفينهم كونما المخزن كورّا وااااهلي فين وصلات معاهم المرا … كورّا مازال لدابا اسواق النخاسة كايتباعو فيهم البنات لي داز يقيس البزازل و يشوف السنان و يقلّبها فحال شي خروفة و لاعطا الثمن يدّيها الله يربّح ! اما داكشي د القراية و الخدمة و المستقبل و الله يامّك لاحلمتي بيه ! غاتعيشي عبدة و تموتي عبدة ! تسخري و تشطبي و تولدي و طيبي و تعجني و تموتي !
المشكلة فبعض الاصوات السواديزون “حداثية لي تاهي ديرونجاتها الصّورة ! و قاليك لا و لكن حيثما حقا ما حقا ماشي مابغيناش لمرا تدخل للجامع حاشا لله حنا غييي و كان مابغيناهاش تدخل لّيه و هي بشعرها مطلوق ! ايه نعام آسّ! و شنو المشكل فشعر المرا ؟! غايبقاو يتأتأو عليك و حقا ما حقا خاصها تستر و الجّامع عندو حرمة و كدا !! و مال السيدة دخلات ليه بالگرصون ؟! راه لابسة لباس محترم عصري ! لباس تقدر تدخل بيه للكنيسة و للجامعة و للابوراطوار و الادارة و المدرسة! بلايص اكثر حساسية من المسجد !
المشكل و مافيه انه بزّاف د المغاربة كايتعقلنو حتى كايتعقلنو ( من العقلانية) و لكن كاتبقا الشوكة ديال المرا مدگوگة فيهم ! الشوكة ديال جسد المرا انه عورة و نجس و خاصك تستري و تلبسي و تغطّي و كدا باش تدخلي لسيدي مولاي الجّامع ! هادشي لي كاين ! النظرة الدونية للمرا و للجسد ديالها و لشعرها، المرا الفتنة، المرا الشيطان! في حين الراجل طبعا أهلا و تفضل يقدر يدخل للجامع مصنّن فيه ريحة التقاشر ! ماغاسلش بّاقلو ! بتيشورت ربحو مع هينيكن حتى واحد ماغايتحاسب معاه ! علاش ؟ حيت راجل وصافي !
Laisser un commentaire