كود هناء ابو علي ///
كانت هدرة على استمرار نعمان لحلو من عدمو فلجنة تحكيم “ستارلايت” ب”دوزيم”. هادا ما خاصوش يكون فبرنامج وفقناة “دوزيم”. يقدر يكون فشي قناة عربية من ديال القوميين
كيفاش تجيب “دوزيم” واحد كيحس بالدونية من كل ما هو مغربي واخا كيحاول يكون فخطابو مدافعا عن المغربي؟ كيفاش هاد الشي؟
لحلو عطاتو “دوزيم” مارشي فبرنامج اسمو “بيانيسيمو”. هو المقدم وهو المعد وهو الباحث وهو كلشي. كيهدر فيه على الموسيقى.
فحلقة من الحلقات اللي دارت هدر على الانواع الموسيقية في المغرب. هنا غادي يخرج هاديك العقلية المشرقية الموغلة فاحتقار ما هو مغربي والمريضة بمركزيتها. كتعتاقد ان المشرق هو الاصل والباقي تابع. كلامو كيصفقو عليه غير خوتو من المشرق.
هاد اللي كيقدم راسو باحث وملحن قال باللي “الانواع الموسيقية في المغرب” كاينة “6”. شوفو كيفاش قسم. هنا خرجات منو هاد العقلية.كاين “الفلكور” بلا ما يحدد اشنا هو هاد الفلكلور. عبارة اكثر قدحية منها وصفية. وداز الثانية هي “الموسيقى العالمة” ودخل فيها “الطرب الاندلسي الغرناطي منه والالة والملحون والسماع”. عالمة باش؟ هو اللي عارف. تنصيف مشرقي غبي. يحتقر كل ما هو شعبي ويصفق لما هو نخبوي. بلا دليل علمي.
وداز للثالثة وهي الموسيقى المغربية العصرية. هنا كان مشرقي بزاف بزاف وبين عنصريتو ضد كل ما هو مغربي. كيقصد بهاد النوع الاغاني اللي جاتها من مصر. ما عندها علاقة بتاريخ بلادنا ولا حضارتو. ماشي مشكل ولكن كان يسميها الاغنية الشرقية علاش العصرية. فين الجانب العصري فيها. مصر خداتها من تركيا والمغرب خداها من مصر. علاش دافع عليها؟ حقاش هو كيغنيها بحالو بحال فنانة اخراين.
فالنوع الرابع قال ليك الموسيقى الشعبية القروية و”المدينية”. هنا تخلطو عليه لعرارم. كيقصد الحضرية ماشي المدينية. حقاش المدينية عندها مفهوم اخر مختالف عن الحضرية اللي كاينة فالحواضر.
والنوع الخامس هو الجيل وكيقصد الغيوان وجيل جيلالة ثم النوع الاخير “الساحة الجديدة” ويقصد بها الموجة الجديدة من الاغاني من راب وروك ووو كيغنيوه مغاربة.
عندو تعالي مشرقي فتقسيم الموسيقى في المغرب. كلشي اللي جا منها ومن الاندلس راه عالم وراقي ويقدر يسميه مغربي واخا ما عندو علاقة بتاريخ هاد لبلاد. فيه شوية المزج بايقاعات محلية ولكن القالب مشرقي.
على هاد التقسيم اللي كيهمش الابداعات المغربية وكيشوف فيها بحال اي مشرقي باللي ما تستحقش تكون فمصاف “الاغنية المغربية” ما خاصوش يكون فلجنة تحكيم فقناة بحال دوزيم”.
هادا عقلو مع المشرق. كيخاطب المشرق وجدانو معاهم واخا فكلامو كيردد العكس. هاد النوع معروف.باش تشوفو ينصح الفنانين باش يمغربو اغانيهم كيبان غير خطاب للاستهلاك وصافي. واحد بحال حاتم عمور رد عليه وقال ليه. قال ليك باللي الفنانة الجداد كيدافعو على الاغنية المغربية كثر منو٬ واضاف فشي تصريح سابق باللي اجواء اغانيه مشرقية وموخودة من اغاني مشرقية. هو ماشي غير غناه٬ حتى كلامو مشرقي وروحو مشرقية. شوفو شكون يعرض عليه. ديما الاسلاميين اللي قلبهم مع المشرق بحالو. هما صحابو وحبابو واللي كيكرموه. هادا خاصو يبعد على دوزيم. هادا كيفسر علاش هاجم الراب بدون معرفة وحط راسو فوضعية مقودة.