كود هناء ابو علي ///
المخزن صعيب وصعيب بزاف. ف10 ابريل 2023 رسل الملك محمد السادس رسالة لعائلة خليل الهاشمي الادريسي المدير العام السابق لوكالة المغرب العربي للانباء٬ فيها اشادة وتأثر ب”وفاة الكاتب الصحفي المقتدر المرحوم خليل الهاشمي الإدريسي” اللي قال عليه “وإننا لنستحضر، بكل تقدير، ما كان يتحلى به الراحل المبرور من خصال إنسانية رفيعة، ومن كفاءة مهنية عالية، ومن نزاهة والتزام وإخلاص في عمله سواء ككاتب ومسؤول صحفي أو كمدير عام لوكالة المغرب العربي للأنباء، فضلا عما عهد فيه من غيرة صادقة وشديدة على مقدسات الأمة وثوابتها، وتعلق متين بالعرش العلوي المجيد”
اليوم 19 ماي 2023 تعين فالمجلس الوزاري فؤاد عارف فبلاصتو على. البيان الرسمي كتب: “وباقتراح من رئيس الحكومة، وبمبادرة من وزير الشباب والثقافة والتواصل، عين جلالة الملك السيد فؤاد عارف، مديرا عاما لوكالة المغرب العربي للأنباء”. كان خاص يجي مدير عام عندو كفاءة مهنية عالية ونزاهة والتزام بحال خليل الهاشمي ماشي واحد حاربو وهاجمو
شكون هادا فؤاد عارف؟ ولد الدار اه. كان صحافي فالوكالة حياتو كلها الا فالسنوات الاخيرة باش رفض يغادر منصبو كمدير لمكتب واشنطن لهاد الوكالة. طبعا خليل الهاشمي دخلو وتحدى كاع اللي دخلو ليه.
عارف ما رضاش وبغى يبقى خدام فامريكا وبقى كيردد باللي داعماه لالة جمانة بنت عمة الملك وسفيرة المغرب في واشنطن. عارف اللي جابوه ل”لاماب” عاون فشي فترة وزير الخارجية ناصر بوريطة. كان باغي ياخد منصب مدير مديرية التواصل وما تعطاتوش.
مزيان يجيبو لاماب واحد ولد الدار. مزيان يكون واحد من هاد الدار٬ غير ماشي فؤاد عارف. ماشي واحد كان ضد المدير السابق ودار عليه حرب. دابا مع صاحبنا الجديد ممكن تكون حرب انتقام ويخلي الخدمة ويديها مولف كيدير بعض المرات ويديها فالمشاكل التافهة