سهام البارودي -كود//
الأمومة راها وظيفة فحال گاع الوظائف خاصها مؤهلات و اليوم اكثر من شحال هادي مايمكنش غا تجي و تكوني أم ! مايمكنش لي ولدات تسمّي راسها أم حيت تا المشة و الكلبة كايولدو ! اليوم فعهد الارتيفيشل انتيليجنس و الشات جي بي تي ! باش تكوني أم د بصح خاصك اولا تكوني قارية ! قارية مزيان ماشي كاتعرفي غا تكتبي و تحسبي ! لا قارية ! و عندك اطلاع و كاتهضري بعلى الاقل لغة اجنبية وحدة، و عندك خبرة فالحياة كبيرة درتيها بالسفر و العمل و الاحتكاك بالناس و تكون عندك الاستقلالية المادية لي كاتخليك تكوني سند لولادك و ماتكونيش عبأ عليهم نهار تكبري !
ضروري هادشي دابا حيت مايمكنش العام لي جا يخرجو لينا دوك الباطرونات ببزازلهم قدام الكاميرا بنفس التزارة باش كايشقاو و كاينعسو ، بنفس زيف حياتي لي عاگداه على راسها سيمانة باش يقولو لينا ” الباك صعيب اوليدي” ” الاستاذة ماخلاوش ولدي ينقل آ وليدي ” ! امهات زعما لي عوالة عليهم الدولة يوجدو ليها مواطينين صالحين هوما براسهم ماواجداتش باش يكونو مواطنات صالحات ! من يامات المسيرة الخضرا و هوما بنفس الحالة ! نفس اللباس باش استقبلو محمد الخامس و هوا راجع من المنفى نفس الحالة باش بكاو على الحسن الثاني ملي مات نفس الحوايج و نفس البؤس و نفس الجهل و نفس التمسكين و التدرويش وووليديي و بنيتي ! نفس الحالة كانشوفوهم بيها كل عام بمناسبة الباك ! باش يخرجو يشكيو و يبكيو حيت الباك صعيب آ وليدي ! وا سيري تخراي !
الأمهات دبصح راه كايخدمو مع ولادهم من كايتزاد باش يوجدوه للحياة، كايقراو معاه و كايعلموه الحروف و الارقام و الالوان و اللغات و كايسايرو معاه فالمدرسة و كايوفرو ليه الامكانيات المادية و النفسيةيكون انسان ناجح و مواطن صالح و نتي جاية تال الدقيقة تسعين تاااال الباك عاد باغا ولدك يجيب الباك و باش بالنقيل ! طز ! باغا المدرسة تقري ليك و تربي فبلاصتك ! نتي ماديري والو نتي بقاي فالدار سادة عليك ! عاوني ولدك غا بكمشة د الزبيب و الدعاء ؟ صافي هادشي علاش قدرك الله !
باش نتي أم ؟ بالولادة ؟ الكلبة كاتولد !؟ باش أم ؟ بالشقا و الصابون و المرقة ؟! غدا غاتولي تشري روبو بستالاف ريال من درب غلف كايطيب و يعجن و يشقا ! زيد شنو آخر ؟ باش نتي أم ؟ فيناهوا الدور ديالك كمربية ؟! فيناهوما التجارب ديالك فالحياة لي غاتقاسميهم مع ولادك ؟ والو ! ناضا ! دماغك فيه غا المرقة و السداري ووليدي و بنيتي ! انسانة فاشلة كاتولد لينا رجال كايتخايلو گاع العيالات فاشلات و بنات كايعاودو تاهوما نفس النموذج الفاشل دمّهم !
Laisser un commentaire