سهام البارودي -كود//
الناس ولا فيهم واحد الفشوش بزاف آولد عمّي! كلشي ولا باغي كلشي! كلشي باغي يشري الدّار مايبقاش كاري، كلشي باغي يسافر فالصيف للشمال مايبقاش ساد عليه بابو، كلشي باغي يشري طوموبيل ومايركبش فالطوبيس وحتى فالعيد كلشي دابا ولا باغي يعيد بزز! بنادم مابقاش كايحتارم الطبقة الاجتماعية ديالو! مابقاش كايحتارم الفقر ديالو! كايقوليك واش الدرويش مايعيدش؟ شوية يولي يقوليك واش الدرويش مايصوگص الرونج روڤر! واش الدرويش مايسكنش فشي ڤيلا ديال بريستيجيا على الگولف؟! واش الدرويش مايذوقش تاهوا مسكين شي سطيك ديال الواگيو الجابوني؟
الدرويش راه ماسميتو درويش إلا وا حيت مقودة عليه، ومقودة عليه كاتعني ماغاديش يعيش حياتو فحال لي مامقوداش عليهم واش حتى هادشي ولا خاصنا نشرحوه لبنادم؟ راه كلشي باين.
راه فعهد الرسول كان “أهل الصفة” فقراء المسلمين لي كانو ماكايلقاوش تافين ينعسو كايتخباو غي فالجامع وكايبقاو بالجوع حتى كايسخفو! فعهد الرسول وقبل من الرسول ومورا الرسول من ديما كان الفقراء وكانو داخلين سوق راسهم! والرسول نّيت وكاين شي حديث كايقول أنه كان كايربط حجر على كرشو من شدّة الجوع! وبنادم شابع خبز وباغي قاليك تاهوا يعيد بستين وسبعين ألف ريال فحالو فحال شي كوماندار فالجادارمية ولا شي طبيب بنّاج! ماعندكش صافي تصنط لعظامك! ماعندكش دخل سوق راسك! آش دّاك لشي عيد؟
وكايطالبو الدولة تتدخل، شنو غادّير ليك الدولة؟ تحيد الحولي للكساب لي العام كامل وهوا خدّام عليه وتعطيه ليك نتا صحّة بعشرين ألف ريال ولا فابور؟ علاش باش جاتك؟ راه السّوق هادي آ السيموحمد الكساب يبيع باش مابغى ونتا شوف لي مسلكك، وإلى حتى حاجة مامسلكاك غانعاود نقوليك دخل سوق راسك !
لاواه نفرحو الوليدات وديك الهضرة العوجة! بنادم باغي يتخبى مورا الوليدات باش يسعى حولي ديال ستين ألف ريال ياخدو هوا فابور ويضرب التقلية وبولفاف والقطبان ويشوفو الجيران مخرج الدخاخن من الدّار تاهوا! لا نتا مزلوط خاصك تعيش حياتك كمزلوط حتى دّير الفلوس وتولي تعيّد بالصردي كومونديه تانتا من الفيرما ديال عبد الحق المسكيني ! الوليدات تقدر تشري ليهم غا كلب وغايفرحو يلعبو معاه! ضبّر فشي جرو وسمّيه ريكس وطلقو ليهم فالدار وهاهوما فرحانين !
بنادم گرصونو مشرگ من لتحت وباغي يشري حولي بستين! بروبليم د الأولويات!