هاد الخوف من المثليين كأنهم تهديد مباشر للأمة راه مبالغ فيه وفيه فهم خاطئ لشناهو الخطر، الخطر الحقيقي هو مايكونوش عندنا في البلاد بنات واعيات وقاريات وعندهم شخصية وقادرات يدافعوا على حقهم ويواجهوا السلطة والمجتمع

محمد سقراط-كود///

شنو هادشي لي مخلي المغاربة يخافو من بنت صغيرة هازة راية قوس قزح، وأغلب المغاربة بالحداثيين بالمدافعين على المرأة بالحقوقيين بالكفار بالمومنين تبرأو منها بحال الى جايا من ووهان في الأيام الأولى لكورونا تاواحد مابغا يتبناها ويتبنى خطابها وجرئتها وشجاعتها وإحساسها بأنها على حق، المتشددين خلاص كيخافو من المرأة تكون أصلا في الشارع أيا كان توجهها الجنسي، علما أن المغاربة بالنسبة لشعوب أخرى ثقافتنا فيها العديد من السلوكات التي تعتبر مثلية في بلدان الغرب الديمقراطي، مثلا جوج ديال الرجال غادين شادين في يدين بعضياتهم هذا سلوك مثلي في ألمانيا بينما هنا سير لباب أي جامع غادي يبانو ليك الرجال خارجين مشادين اليدين من ورا الصلاة، كذلك في الأسواق الأسبوعية والبوادي جوج رجال أو عيالات مشادين باليدين وغادين هادي حاجة جد عادية عندنا بينما في بلايص خرى تبغي تشد يد شي حد يقدر يعتبرها تحرش أو يقوليك سمحليا راني ستريت فايتر.

حتى من ناحية المساحات الخاصة عندنا عادي الدراري والرجال يتستفوا حدا بعضياتهم وينعسو وكذلك النسا، بل العكس الى وقعات بين الدراري والبنات تما لي فين الموشكيل وهادشي راه العكس، لذا راه هاد الخوف من المثليين كأنهم تهديد مباشر للأمة راه مبالغ فيه وفيه فهم خاطئ لشناهو الخطر، الخطر الحقيقي هو مايكونوش عندنا في البلاد بنات واعيات وقاريات وعندهم شخصية وقادرات يدافعوا على حقهم ويواجهوا السلطة والمجتمع، لي كيخلع حقيقة هو كولشي يكون منبطح ومطبل ومصفق للسلطة واخا تكون ضاراها وواصلة فيه للعظم وفاش ينتافض ميطالبش بحقو وإنما يسعاه ويطلبو وتلقاه واقف مدروش وظهرو مثني على جوج ويبدا بداك الدخلة ديال الصحرا مغربية وعاش الملك وحنا بغينا غير حولي صردي فابور نفرحوا بيه الوليدات ويبدلو لينا البراكة ببقعة تجارية شوكة .

بنت هزات راية الألوان خلقات هاد النقاش كامل وناضوا يتبرؤو منها هادوك لي من المفروض يساندوها، راه النضال من أجل حرية الألوان هو نضال أساسي وداخل فيه كاع الأقليات، إبتداء من الأندبندنت وومن وصولا للمتحولين هادو كلهم راه القوانين كتعاقبهم من عيش ذواتهم وعيش حراياتهم ، مازال القضية عند المثليين مرخوفة شوية يمكن لجوج ديال الرجال يشدو أوطيل ويباتوا يحرثوا الفول مع راسهم وكذلك جوج بنات، ويمكن ليهم يمشيو شادين في يدين بعضياتهم في سوق لاربعة ولاد عمران، هادوك لي ستريت هوما لي عندهم موشكيل من هاد الناحية، التنوع راه زينم وبلاد على قدها ماخاصش تخلعها بنت هازة راية قوس قزح.

إقرأ الخبر من مصدره