كود الرباط ///
مشهد مهين لكل مغربي وقع فالرباط. ما معروش التاريخ بالضبط. بطلو خليجي. صور بنت غادي يكون عندها شي عشر سنين. هاد البنت كتطلب. يعني امها او باها غادي يكونو قراب منها. كيطلبو بيها. مشات عند هاد الخليجي اللي وثق بالكاميرا كلشي. البنت جات عند الخليجي وبدات تدعي مع شي حد اسمو “الشيخ حمدان”. عارفة اسمو واسماء اخرين. يعني مع عصابة كتخدمها باش تمشي غير عند الخليجيين فمحج الرياض فالرباط.
البنت بقات تدعي مع الشيخ حمدان وبدات حتى بغات تبكي كاع. بوليسي ومردة كانو قراب من هاد الشي. قال ليهم الخليجي خليها وهما يخليوها. حدا هاد رجال القوات العمومية غادي يتهان رئيس الدولة. البرهوشة غادية تقول باللي عطاها الشيخ حمدان الف درهم وباللي هو احسن من المغرب ومن ملك المغرب. الخليجي بخبث دار عنوان فيه “بنت في المغرب. شافت صورة الشيخ حمدان وتذكرت موقف معاه وبكت” ولكن المضمون فيه ضرب للمغرب لملك المغرب.
الخليجي بان غاية فالسعادة بتوثيق هاد الشهادة من العاصمة لمغربية ضد بلادها وضد ملكها. شكون المسؤول على هاد الفيديو؟
ساهلة نقولو بات البنت وامها. مسؤوليتهم قائمة والطليب والسعاية خاصها تحيد وتمنع بالقانون وكاع الحكومات فشلو باش يمنعوها. بحال ايلى كاينة شي مافيا واقفة ضد هاد القرار. خاص اي بنت او ولد صغير يطلب يحيدوه لوالديه ويتابعوهم ويكون الحبس فهاد العقوبات. \
ثم كاينة مسؤولية الدولة بكاع مؤسساتها. شكون كيخليهم يمشيو يطلبو. شكون يخليوهم فالشارع. علاش ما دار والو باش نقضيو على هاد الظاهرة اللي غادية وتكبار.
دابا باش وصلات لرئيس الدولة يمكن يتحركو. غير ما خاصوش يكون تحرك غير فهاد الشارع.