كم جميل أن تكون صيدلي في دولة لا تفرض عليك التواجد في الصيدلية فقط علق الكارطونة وطلع الريدو وحط بنت تبيع الدوا ونتا سير قابل الفيرمات والمحلبات والمشاريع، المهنة الوحيدة لي محتاجة شهادة ولكن ممحتاجاش التواجد في عين المكان لممارسة مهنة الصيدلة

محمد سقراط-كود///

هادي سنوات مابقيتش تلاقيت شي صيدلي أو صيدلية أصحاب الشهادة ولي حالين المحال، في الغالب كنلقى غير المستخدمين لي مقابلين ليهم وهوما معامن كنتعامل وهوما لي كنعرف، واخا راه ديما كنشري الدوا بحكم أنني قربت الربعين وكنت كنكمي مع عدة مورثات جينية خارية عليها راه الدوا والطبيب أصبح أمر ضروري وماشي غير كانة، ولكن لي لاحظت هو أن الصيدلي كنظن المهنة الوحيدة في المغرب لي ممحتاجش يكون ومع ذلك المشروع خدام والدوى كيتباع، على خلاف مهن أخرى لي مايمكنش تتعوض، تاواحد مكيمشي عند الطبيب وكتدوز ليه غي الكاتبة، أو تمشي عند المحامي ونهار المحاكمة تترافع عليك الكاتبة ديالو أو الشيفور، أو تمشي عند الميكانيك تصاوب شي موشكيل في الطوموبيل وينوض يبدى يخدم ليك جارو مول الروايض، كل محال أو مهنة محتاجة تواجد لي كيمارسها في عين المكان إلا الصيدلة.

الصيدلية في المغرب عبارة على حانوت ديال الدوا من باب التعقيدات والشكليات محتاجة شهادة في الصيدلة من أوكرانيا ولكن ممحتاجاش التواجد في الصيدلية فقط جيب الديبلوم علقو في الحياط قاد المحال وجيب شي بنت أو ولد يقابلوه ويبيعو الدوا ونتا جي جمع الروسيطة وسي قابل الفلاحة أو المحلابة أو شي مشروع ديال بيع بيض النعام، وحتى راس المال مابقاو محتاجينو دابا كتمشي تسول غير على دوليبران خاص تسنى ليفرور حتى يجيبها، يمكن تحل الحانوتة ديال الدوا وتخليها خاوية ولي جا بغا دوى وصي عليه في التيليفون وقوليه تسنى الليفرور المهم هو كثر الكراسة في المحال والى كانت حداك شي قهوة هناك الله.

شحال هادي كنت كنظن أن من أكثر المهن لي كورثوها أبا عن جد هي الطب، بحكم كنعرف أطباء كثار واليديهم نيت كانوا أطباء، ولكن صحح ليا واحد الدكتور صديق ديالي عندو عيادة قرب مادام لولو، بأن الصيدلة هي أكثر مهنة تورث هي الصيدلة بحكم أنها كتكون أصلا واجدة عند الأب أو الأم، الحانوت كاين وعندو كليان وعامر سلعة فقط تحتاج شهادة من شي دولة في أوروبا الشرقية وهانتا مقابلو بقا فيه أو دير ديالك من بعد، وحاليا كاين جيل ديال الصيادلة أعدى حاجة عندو هي يريح في المحال يقابل خدمتو، على عكس أبائهم لي كانو كيديروا الطب والمستعجلات ووكولشي، كان عندنا واحد السيد في الحومة السواني في اللول كان في صيدلية الغزالي وتحول من بعد الله يذكرو بيخير حسن فرمصيان كان فيه طبيب وفرملي ووجراح الحومة كلها كتدوز عندو وكان جد متفهم وعلى دراية كبيرة بالمهنة، حاليا الصيدلية تحولات لحانوت كتعطيه الورقة يعكيط الدوا وصافي بلا نصائح بلا فهم بلا تصحيح أغلاط ومعلومات بلا تواصل بلا حتى حاجة، كم جميل أن تكون صيدلي في دولة لا تفرض عليك التواجد في الصيدلية فقط علق الكارطونة وطلع الريدو وحط بنت تبيع الدوا ونتا سير قابل الفيرمات والمحلبات والمشاريع.

إقرأ الخبر من مصدره