بن عبو لـ”كود”: بلادنا غادي تعرف موجة حرارة استثنائية وراه ممكن توصل لأرقام قياسية هاد السيمانة وهاد العام دخلات ظاهرة النينيو

عمـر المزيـن – كود//

أكد محمد بن عبو، الخبير في المناخ والتنمية المستدامة،، أن مجموعة من المناطق المغربية غادي تعرف فالأيام الجاية درجات حرارة “قياسية واستثنائية” في ظل موجة حر اللي غادي تسود المملكة بسبب كتل هوائية جاية من الصحراء الكبرى.

هاد الموجة ديال الحرارة، حسب ما أكده بن عبو في تصريح لـ”كود”، من الممكن تتجاوز المعدلات المسجلة عادة خلال شهر يوليوز من كل سنة بما يتراوح بين 5 درجات إلى غاية 12 درجة.

وأضاف: “عادة ما كيعرف المغرب ارتفاع في درجات الحرارة في المناطق الداخلية خلال فصل الصيف لكن الاستثناء هاد العام هو دخول ظاهرة النينيو حيز الوجود واللي من المحتمل أن تزيد من درجة ارتفاع الاحترار العالمي لمستويات قياسية والمغرب ماشي بعيد من هاد السيناريوهات المرتقبة”.

وذكر الخبير في المناخ أن “المغرب كان عاش موجة حر استثنائية شبيهة بهادي لي غادي نعيشو هاد السيمانة وكانت فنفس التوقيت من شهر يوليوز من عام 2021، ولي تم تسجيل أرقام قياسية حيث سجلات محطة سيدي سليمان 49.6 درجة مائوية، لكن عام 2020 كان العام الأكثر حرارة على الإطلاق في المغرب “بمتوسط حرارة فاق المعدل المناخي العادي لفترة 1981-2010 بحوالي 1,4+ درجة مئوية”، وفق ما أفادت مديرية الأرصاد الجوية في وقت سابق”.

وعلى المستوى العالمي، كيقول بن عبو لـ”كود”، تشير المنظمة الدولية للأرصاد الجوية وخدمة الأرصاد الجوية البريطانية إلى أن احتمال تجاوز عتبة درجة الحرارة العالمية فوق 1,5 درجة في السنوات الخمس المقبلة يبقى قريب وقريب جدا ويمكن تحطيم هذه العتبة في أي وقت من الأشهر المقبلة.

إقرأ الخبر من مصدره