كود هناء ابو علي ///
رئيس مصلحة الاستعلامات العامة عندو قوانين بوحدو. كيطبق القوانين كيف بغى. كيفهمها كيف بغى. الجمعة مشى لنادي فكورنيش كازا وجاب معاه فرقة كبيرة. قال ليك يا سيدي عندو رخصة وحدة للخمور وهو كيوزعها فالريسطو فبلايص اخرى حدا البيسين.
هو نادي فيه مسبح وريسطو.. يعني باسم النادي عندو رخصة وحدة كافية. ثم كون هاد رئيس الاستعلامات العامة بغى يطبق القانون كان يطبقو ومول النادي موجود ماشي غير يسافر ويرسل ليه جيش من الموظفين.
نقطة اخرى هي ان بلايص اخرى فكورنيش عين الدياب عندهم رخصة وحدة لعدد كبير من المطاعم، علاش السيد رئيس المصلحة ما يمشيش يطبق عليهم القانون. يمشي عند هشام رادة مول بالموري اللي عندو مجمع ديال الريسطورات ورخصة وحدة. ايلى كانت عندو الشجاعة يمشي يطبق القانون فالبيري وخوتو من المطاعم ويدوز ل”ماناوس” راه كاين 3 المطاعم كلهم ديال طاطا مرجانة مرات هشام برادة.
هادي بلاد عندها قانون واحد خاصو يطبق على جميع المطاعم والاندية. ماشي قانون يطبق فبلاصة وبعيد بعشرات الامتار كيطبق قانون اخر.
المغرب خرج من ازمة “كورونا” ضربات قطاع المطاعم بحال كاع القطاعات. بدا القطاع كيرفع الراس. خاص اللي مسؤول يعرف هاد الشي حتى هو ولكن قبل يطبق القانون على كلشي بنفس الدرجة.
رئيس الاستعلامات دارها گد راسو. عاود عورها بحال ديك المرة للي مشى لنشاط ثقافي منظماه ڤيلا دي زار فكازا وبغى يوقف نشاط. ما عرفش راسو فين مشى.
بحال هادا خاصو يمشي فحالو. الوقت ماشي وقتو. طريقتو فالتدبير ماشي حتى طريقة تدبير الادارة العامة ديالو.
Laisser un commentaire