كود احمد الطيب الرباط ///
البارح السبت 15 يوليوز 2023 فالليل الجماهير دخلات لتيران مولاي عبد الله بالرباط لحضور فينال كأس العرش بين الرجاء البيضاوي ونهضة بركان. فشلو المنظمين لصقوها فادارة الرجاء ونادي الرجاء ورئيس الرجاء.
هادا راه اخلال بالمسؤولية. هاد المسؤولين راهم هربو من المحاسبة باش طاح التنظيم علقو النادي الاخضر.
فالفينال اللي كاين فالرباط ماشي نادي الرجاء البيضاوي ولا ادارتو ولا نادي نهضة بركان ولا ادراتو المسؤولين على هاد الفوضى. على هاد التسيب. والي الرباط وفوقو وزير الداخلية هما المسؤولين اللولين.
الجانب الامني مسؤوليتهم. التنظيم مسؤوليتهم. الفشل فالتنظيم مسؤوليتهم. علاش هادو بغاو يتهربو وبغاو يلصقوها فبودريقة او غيرو.
نادي الرجاء البيضاوي اليوم مسؤول على اللعابة اللي غاديين يلعبو فقط. ايلى السلطات بان ليها باللي كاين ما يهدد امن وسلامة ناس الرباط واللي غادي يجي من الجمهور للعاصمة كانت تاخد قرارات كثيرة. تمنع التنقل. تنقل الماتش لبلاصة اخرى. تدخل عن بعد. تنظم اكثر. عندها عشـرات الحلول. لكن باش شي مسؤولين يلصقوها لرئيس نادي راه تهرب من المسؤولية.