المرأة رجعت الهيبة للتحكيم المغربي اللي فشل فيه الرجل.. بشرى كربوبي ومساعداتها غيلعبو ماتش ميريكان وفيتنام فمونديال السيدات

كود سبور//

غتصبح الحكمة الدولية بشرى كربوبي أول مغربية، تلعب ماتش فكاس العالم للسيدات، بعدما تم اختيارها لقيادة ماتش الميريكان وفيتنام السبت الجاي، فمونديال 2023.

وقرر الاتحاد الدولي لكرة القدم يعطي قيادة ماتش المنتخب الأمركي لطاقم مغربي بقيادة بشرى كربوبي كحكمة ساحة، وفتيحة جرمومي كحكمة مساعدة أولى، وسكينة حمدي كحكمة مساعدة ثانية، أما الحكمة الرابعة فهي الكرواتية إيفانا مارتينسك.

الماتش بين الميريكان ومنتخب فيتنام هو عن الدورة الأولى من المجموعة 5 لكاس العالم اللي كتنظمها أستراليا ونيوزيلندا واللي بدأ اليوم.

وللإشارة فالحكمة بشرى كربوبي هي والمساعدتين ديالها فتيحة جرمومي، وسكينة حمدي، نجحن فيما فشل فيه الحكام المغاربة الرجال، اللي ما لعبو حتى ماتش فمونديال قطر 2022، والمشاركة ديالهم كانت قليلة وفقط كمساعدين بغرفة الفار.

إقرأ الخبر من مصدره