عقلية العشش والخيام مابدات كتكتاسح الشواطئ المغربية حتى أصبح من الممكن لربة بيت من اطراف المدينة تتنقل بكل سهولة هي و ولادها وكواملهم ومقلتهم وخبزهم ومونادتهم لابعد بحر ونقل النص في الدار ليه بكل سهولة

محمد سقراط- كود///

كنعقل في التسعينات مكانوش الامهات المغربيات الشعبيات صحابات الطابليات والجلالب كيمشيو للبحر بنفس الوثيرة باش كيمشيو دابا، البلايا ديال طنجة وصولا لمالاباطا كانو فيها جوج شواطئ خاصة واحد جنب المون ديال البلايا كنظن تابع لأوطيل الريف وواحد في مالاباطا تابع لأوطيل طارق ، كيعومو فيهم الاجانب عريانين سفاحي بلا سوتيان كيتشمشو غير بالسليب وواقفين حداهم المخازنية حاضيينهم من نظرات المغاربة ، والصراحة مكانش شي مشهد لي غريب بحكم انهم كانوا اجانب مكناش كنشوفوهم بنفس الحكم الاخلاقي لي غادي نديرو كون شفنا مغربيات وخصوصا فقيرات بنات الحومة كيعوموا معريين صدرهم داك الساعة كنا غادي نتصدمو ، راه حتى لي لاباس عليهم وكنا كنقولوا هادوك راه عقلية گاورية او عايشين بحال الگور ومكنزيدوش نتدخلو فيهم .

وحيت هاد المناظر العيالات لي جاو من القرية ومن مدن اخرى او هبطوا من الجبل لطنجة مكانوش كيفضلوا انهم يشوفوها فمكيمشيوش للبحر اصلا، الى جيتي تسول جيل التمانينات غادي تلقى قليل بزاف لي فايت ليه مشا مع الام ديالو للبحر في الغالب كانوا كيمشيو الدراري بيناتهم جماعات ، ومرة مرة كتمشي الام مع العائلة والولاد ، اصلا اغلب الامهات المغربيات مكيعرفوش يعومو وماشي من المتع المحببة ليهم ، مكيتبرونزاوش حيت اصلا كيبقاو بحوايج الدار بالاظافة الى التنقل للبحر كان مسألة كارثية، راه في التسعينات كان النقل في المغرب شبه نادر، راه غير من سواني لمالاباطا كان خاصك نص نهار كتدوزو غير كتسنى الطوبيس، ماشي بحال دابا النقل موجود ترامواي كيهزك من قاع كازا ويحطك في عين الذياب، شحال هادي راه كانت رحلة حقيقية ، اذا مكناش كنشوفوا هاد قوة ليزارات والگوامل والطناجر وهاد لحماق في اي كاين دابا في گاع الشواطئ ديال المغرب .

عقلية العشش والخيام مابدات كتكتاسح الشواطئ المغربية حتى أصبح من الممكن لربة بيت من اطراف المدينة تتنقل بكل سهولة هي و ولادها وكواملهم ومقلتهم وخبزهم ومونادتهم لابعد بحر ونقل النص في الدار ليه بكل سهولة، وحتى توفر الطوموبيلات حاليا راه كثر من التسعينات بالضوبل عدة مرات، ومن بعد ماعشنا ترييف المدن هانحن نعيش الآن ترييف الشواطئ وتحويلها من اماكن للاستجمام لمخيمات للاجئين، بكل انانية وقلة الترابي نتا مريح كتشوف في البحر كتجي عائلة قبالتك كيحطو رحليهم ويطلقو ليزارات ويبنيو عشة ويضرگو عليك المشهد اي جاي نتا تشوفو ويصاوبو قبالتك الاجواء ديال غزوات الدوتراكي، وطبعا السلطة كتحمل دور كبير في هاد الحالة حيت في شواطئ الشمال بحال المينا مثلا المقدم والمخازنية كيدورو اي واحد داير ايزار كيحيدوه ليه ومنقيين البحر وهادشي لي خاصو يتدار ويتعمم في المغرب كامل ماتبقاش الداخلية كتفرج في المغرب كيتحول لدوار كبير.

إقرأ الخبر من مصدره