سهام البارودي – كود//
هوا التقشاب لابغينا نهضرو على التقشاب راه حتى المنتخب د الرجال شحال قشبنا عليه و كاين گاع لي مشا بعيد و سما عليه منتخب شيخات الاطلس ! و قبل الانجاز د قطر لي كان مفاجئة راه كنا موالفين ديما كاناكلو قتلة من عند منتخبات افريقية لي المستوى ديالها متوسط جدا ! و كنا ديما كانخليو الطيارة ديالنا سخونة باش دغيا نرجعو فيها !
ولكن ردود الفعل على الخسارة د المنتخب النسوي ماكاتحسش فيها غير التقشاب اللطيف ! لا كاتحس بيها عامرة بالسم و الحقد و الحگرة ! و داكشي لي عطانا ناس كايتنمرو على لون اللاعبات و بشرة اللاعبات و شعر اللاعبات ! فحالا ماشي جينات المغربي و المني د المغربي لي شبعان خبز و اتاي لي عطاونا دوك اللاعبات ! فحالا دوك اللاعبات ماكايشبهوش لينا و لخواتاتنا و جاراتنا و صحاباتنا !
آلاواه الألمانيات صحاحات ! الألمانيات طوالات ! الألمانيات عراضات ! الألمانيات ربحوكم ! أولا كبيرة الألمانيات صحاحات حيت رجالهم صحاح تاهوما و جدودهم ابا عن جد صحاح ! و طوالات حيت رجالهم طوال ! و عراضات حيت رجالهم عراض ! و بويض حيت رجالهم بويض و زوعر حيت رجالهم زوعر ! نتا داير كي بوبريص ماعند دين امك حتى لون و كاتنمّر على بشرة بنات بلادك ! ! و لي غالبا غالبا ماعندكش السوفل ديالهم و لاعطيناك كرة تشوتها من نص التيران غايوقف ليك القلب !
ثانيا هادي هي كرة القدم فيها الربح و فيها الخسارة و هاد البنات قبل مايوصلو لأستراليا راه ربحو شحال من فرقة فاش كنتي نتا ناعس كاتحزق !
ثالتا و هي الأهم واش ألمانيا غاتلقى فيها شي لاعبة كان خوها كايسلخها و يجرها من شعرها باش ماتلعبش الكورة فحال حارسة المرمى خديجة الرميشي ! واش بعدا منتخب الرجال ديالنا عمرك سمعتي بونو كايعاود على شي ختو كانت كاتقمشو و تنتفو باش مايلعبش كورة ؟ واش المانيا غاتلقى فيها شي لاعبة لي مها كاتقوليها ها السخط ها الرضى لاعاودتي لعبتي الكورة ؟! واش المانيا غاتلقا اللاعبات ديالهم كايتعرضو للتنمر على اساس اللون او الجنس فالفايسبوك و المجلات ووسائل التواصل ؟! طبعا لا ! مستحيل تلقى هادشي فألمانيا ! ديك الألمانية راها من و هي صغيرة و هي مرتاحة، عايشة فمجتمع عاطيها حقوقها و مآمن بيها كفرد كامل من المجتمع ! كاتلعب كورة فحالا كاتشطح البالي فحالا كاتعزف الناي ماكاينش فرق ! غاتلقى ماماها و باباها مساندينها وواقفين معاها و خوها كايشجعها ماشي كايسلخها!
حنا المباركين لي وصلنا تال أستراليا أما فاش كاتشوف النيڤو لي كاتعيش فيه المرا فالمغرب ! راه تورنورا د رمضان و موحال تربحها !
Laisser un commentaire