عندها علاقة بملف الحريگ.. وزيرة خارجية السنغال دارت زيارة تحت الدف للداخلة

الوالي الزاز -كود- العيون///
[email protected]

قالت مصادر مطلعة لـ “گود”، أن وزيرة الشؤون الخارجية السنغالية، عيساتا تا صال دارت زيارة قصيرة تحت الدف لمدينة الداخلة، البارح الثلاثاء.

وأضافت مصادر “گود”، أن الزيارة ديال وزيرة الخارجية السنغالية للداخلة تخللها لقاء دارتو مع والي جهة الداخلة وادي الذهب، لمين بنعمر، بالإضافة لزيارة المركز الإستشفائي الجهوي الحسن الثاني بمدينة الداخلة، فضلا عن زيارة لمركز الإستقبال الوحدة.

الزيارة وفقا لمصادر “گود” كان عندها علاقة بملف الهجرة غير الشرعية، بحيث تشهد سواحل جهة الداخلة هجمة كبيرة ديال المهاجرين غير الشرعيين خاصة لي جايين من السنغال، مع العلم أن فصل الصيف هو فصل الذروة بالنسبة للمهاجرين غير النظاميين بسباب أن البحر وعلو الموج كيكون ملائم للحريگ فإتجاه جزر الكناري.

ووسط حالة من التكتم لي كاينة على الزيارة، كاينة هدرة كتقول أن عدد من المهاجرين غير الشرعيين من جنسية سنغالية تم إيقافهم نواحي الداخلة كيخوضو إضراب عن الطعام فشي مركز إستقبال، وفيهم لي فالسبيطار داكشي علاش مشات للمركز الإستشفائي الجهوي الحسن الثاني وزارت مركز الإستقبال.

هاد الزيارة أيضا كتجي بعد عملية ديال ترحيل العشرات من المهاجرين السنغاليين لي كانوا تشدو فسواحل الداخلة في إتجاه السنغال براً مرورا بموريتانيا هادي 10 أيام تقريبا.

إقرأ الخبر من مصدره