كود هند لكلاوي ////
رئيس الدولة محمد السادس هدر فخطاب العرش نهار السبت 30 يوليوز 2023 على “الجدية” اي المعقول بلغة لمغاربة. وشدد على ان هاد التصور خاصو يكون “مذهبنا فالحياة والعمل وكاع المجالات” قال خاص المعقول بالحياة السياسية فالقضاء فالصحة فالتعليم فالشغل فالسكن فالفاعل الاقتصادي فالاستثمار فالاعمال فالانتاج
وشدد محمد السادس باللي هاد المعقول او الجدية كمنهج متكامل كتقتضي “ربط المسؤولية بالمحاسبة” واشاعة “قيم الحكامة والعمل والاستحقاق وتكافؤ الفرص “.
اجيو نطبقو هاد لكلام على تدبير ملف كيبان عادي واقع دابا فمونديال استراليا نيوزلندا للسيدات. هنا قناة عمومية اللي هي “دوزيم” رسلات بوقاحة مديرها فالماركوتينگ والديجيطال عادل الشكيري باش يحوص ويفوج بفلوس الدولة فاستراليا. دار وشاف فميبلورن ونشط وفوج فاديلاد وغادي يكمل جولتو السياحية ببيرت.
فين ربط المسؤولية بالمحاسبة. فين الجدية فهاد الشي. شكون رسلو وعلاش اصلا يسافر واش من علاقة عندو بالرياضة وعلاش فين ما تحركات هاديك الفرقة اللي خدات مارشي ف”دوزيم” وهاديك فضيحة اخرى٬ لاصق معاهم. فلوطيل فالتنقل فكلشي.
ثم كيفاش سيدنا كيهدر على المعقول باش يبانو الكفاءات ودوزيم معروفة بتواجد صحافيين وصحافيات قافزات فالرياضة فالمواضيع المجتمعية. مهنيات ومهنيون كتغيبهم القناة وكترسل فرقة صغيرة من صحافي وكاميرامان وصحافي فموقع دوزيم” كيديرو خدمة مضاعفة انتاج وجودة مقارنة بعصابة “الفرقة”.
هاد الفرقة خدات كونسيبت كانت بداتو “ميدي 1 تيفي” وعاوداتو وخدات مارشي كبير وعطاتو لشي حد منتحل صفة صحافي اسمو سعد عبيد بحالو بحال الرباعة اللي معاه. داك الطبيب وديك الممثلة جبارة هند وديك لجواهري.
صحافيو “دوزيم” بامكانيات بسيطة بزاف بزاف كيديرو الصحافة وكيديرو خدمة مقادة وهاد لكلونات دايرين فينا الضحك.
دابا باش يكون كلام رئيس الدولة عندو اثر خاص محاسبة ادارة القناة الثانية على هاد التخربيق.
خاص قرار واضح ضد مدير الماركوتينگ والديجيتال. خاص يوقفو ديك المهزلة اللي سميتها “الفرقة”.
دارو فضيحة كبيرة باش هاجمو وسيلة اعلام مغربية فاوطيل باديلايد. هادي قصة تعاودها ليكم “كود” بوحدها.