كود كازا ////
مدير وكالة المغرب العربي للانباء فؤاد عارف ما رسل حتى حد لمونديال استراليا نيوزلندا للسيدات. هاد المونديال حدث عالمي مغربي. كيعرف مشاركة المنتخب المغربي لاول مرة فالتاريخ.
كيفاش مدير عام يراطي حدث بحال هادا. فمونديال قطر الاخير كانت وكالة المغرب العربي للانباء دايرة خدمة مزيانة. واخا كانو غير جوج للي مشاو من الرباط زايد الصحافي اللي مسؤول تماك ولكن بهاد الفريق لقليل كانو متميزين
واش عدم تغطية حدث كبير فتاريخ الكورة المغربية وبالطبع الرياضة المغربية داخل فاستراتيجية هاد المدير اللي شي وحدين بغاو يقدموه كطاقة مزيانة غادية تعطي للوكالة قيمة جديدة.
اللي بان مع هاد المدير اللي كيدير تغطية حدث كبير عن بعد٬ هو عندو مشكلة مع الاولويات فالبلاد. ماتشات الكورة النسائية راه ماشي غير كورة. راه موضوع مجتمعي كبير.
شفنا كيفاش جورنالات كبيرة امريكية معروفة بانتقاداتها الكثيرة للمغرب فموضوع حقوق الانسان بحال نيويورك تايمز٬ اهتمات بهاد المنتخب. عطات بيه صورة زوينة على لبلاد. طبعا عريف غادي يكون قراه وشافو
دابا هادا مسؤول هادا يضيع حدث بحال هادا. كان ممكن يرسل غير صحافي من شي مكتب تماك. فجميع الندوات الصحافية واللقاءات ما عمرنا شفنا “لاماب” ولا تلاقينا بناسها. برافو للسيد العبقري
Laisser un commentaire