رحاب نائبة رئيسة نقابة الصحافيين كتخص “كود” بهاد المقال: أش هاد الغيلوف؟ دوزيم كتصرف على التقية حاشاكوم سعد والفرقة/ السرقة ديالو

حنان رحاب٬ نائبة رئيس النقابة الوطنية للصحافة المغربية ///

الشماليين عندوم واحد الكلمة للتعبير على القرف، وهي “الغيلوف” لي كتعني شي حاجة كتجيب التقية والردان، شي حاجة مقززة، وكيقولوها كذلك على شي حاجة حامضة وباسلة.

هادشي لي حسيت به، وأنا كنشوف واحد الحلقة من شي برنامج سميتو “الفرقة” فدوزيم، والحقيقة خاص تبدال القاف بالسين في سمية البرنامج، ويولي سميتو” السرقة”.

ماشي غير سرقة المال العام، ودوزيم تفرق الفلوس وهي لي مصدعانا سنوات بالأزمة المالية على شي كائن اسميتو “سعد” ونيت طايح عليه السعد، ملي دار شركة من والو، وبدات تجيه الصفقات بيليكي، بلا ما يدمر،بحالهاد البرنامج لي عطاه مدير دوزيم للشركة الخاصة ديالو، في حين بأقل من تلك التكلفة قادين صحافيي القناة يديرو ما أحسن بكثير.

السرقة كذلك هي سرقة الأفكار، ويا ليت كانت شيأفكار زعما.
الحلقة لي كتب عليا سيدي ربي نشوفها، ولا راد لقضاء الله، ولا يحمد على مكروه سواه، هي حلقة خاصة بانتصار المنتخب النسوي على عيالات كوريا الجنوبية.
لقيت واحدة تشهرات بفيديو فتيك توك على شطيحةخاصة بأغنية ” شيفورك أ حليمة”، لا هي صحافية، ولا رياضية، ولا مثقفة، رأسمالها “شيفورك أحليمة داواه الجدارمية”، كتعاود نفس التمثيل لي دارت فقطر، وبطريقة مفروشة، أي صوتها تبح وهي كتشجع.

وواحد الممثلة مكتفرقش بين التمثيل قدام الكاميرا فمسلسل مغربي، وبين تسجيل فيديو فالتيران لي كيفترض بنادم يكون سبونتاني، ماشي مشغول بالماكياج وبطريقة نطق للكلمات لي الواحد باغي يقولينا هو كيليميني وتربى فالفشوش.

واحد زوج ذكور، واحد مول الشركة سعد، وواحد شيمؤثر قاليك سميتو عبيد الله، كينقزو بشكل كاريكاتوري، بلا مندويو على الأزياء المغربية لي كلات العصا، بديك الشكل ديال الدازاين لي حول المدرجات لأشبه بشي فرقة د الشعبي من أيامات الستاتي بالموسطاج.

وزيد عليها ديك الأفكار العبيطة، لي من كثرة متعاودات، ولات بحال ديك البسالة لي مزال شي كلونات كيديروهامع الداري الصغار فزمان التكنولوجيا المتقدمة، ومن الأمثلة، انك تلبس مواطنين من أفارقة من ذوي البشرة السوداء التوني ديال المنتخب، من نفس الحجم واخا هوما شي غليض وشي طويل وشي قصير، وتبغي توهمنا أنهم جاو خصيصا باش يشجعو المنتخب المغربي، مفروشة أعمي، أو فيما يبانليك شي حد من شي جنسية أخرى،شيش شينوي أو نجليزي، تحطليه كشكول د المنتخب لي مكيتباع غير فالسويقة ديال درب السلطان، وتوهمنا زعما حتى هو جاي يشجع المغرب.

أما قمة سرقة الأفكار، هو ديك اللعيبة ديال نجمعو الزبل بعد نهاية الماتش، لي العالم كلو عارف بلي الجابونيينهوما اللوالا لي داروها فكأس العالم ديال روسيا، ومن بعد تميعات.

وفالحقيقة الزبل لي خاص يتجمع هو ديك البرنامج

إقرأ الخبر من مصدره