كود أكادير//
البارح كان حفل ديال الفنان أمين بودشار فمسرح الهواء الطلق وسط أكادير وهو أول نشاط من بعد إعادة الافتتاح ديالو بعد أشغال الترميم والصيانة.
المنظمين وبحكم التجربة لي ناقصة عندهوم ترونات عندهوم القضية والناس لي خلصات التيكي دخلات ومالقاتش بلاصة وهادشي لي قلق عدد من الناس لي حضرو وأغلبيتهم نساء محجبات لابسين البيض.
المشكل ديال هاد المنظم (و.س) لي فشل فعدد من التظاهرات لي نظمها خلا عدد من المتتبعين للشأن المحلي يتسألو على شكون جابو يبقى ينظم التظاهرات بعد حفل الألوان فملعب أدرار وقبل كان كايديرو فشي بلاصة وكان ديما كايوقعو فيه مشاكل ها لي تحرق ها لي ضربوه بميكرو وغياب الأمن ديما معروف فتظاهرات هاد المنظم.
وحسب مصادر كود فالمنظم المحظوظ واخا دخل فلوس صحيحة من التيكي لي تباعو كاملين شد مسرح الهواء الطلق فابور من بعد دارت أخبار أنه خلص ولكن مصادرنا نفات واش خلص شي حاجة .
الناس دابا كتساءل على شكون جاب هاد المنظم لي كان فواحد الكروب فلافاك سميتو JLM ودابا ولات عندو شركة كايدعموه المجالس المنتخبة وكاينظم تظاهرات وولا لوبي فهادشي ديال التظاهرات فأكادير.
أكادير خصها تدعم ولادها لي كايمشو ينظمو تظاهرات فمدن أخرى، ماشي شي واحد حيث غير كايبحلس لشي مسؤولين عاطينو كولشي هادشي لي قال واحد الفاعل الجمعوي فاتصال مع گود.
Laisser un commentaire