كود اسماء غربي ////
سالى المونديال الاسترالي الخاص بالعيالات بالنسبة للبؤات. دارو مونديال للتاريخ. واخا خسرو اليوم ب4 لزيرو راه الكورة المغربية الخاصة بالعيالات غادي يولي عندها تاريخ قبل المشاركة وتاريخ بعد المشاركة. تتأهل للثمن فاول مشاركة فالمونديال حاجة كبيرة بزاف.
هادا ورش يالله بدا فالمغرب. خاص بطولة مقادة وقاعدة اللعابات تتوسع باش تقدر تنافس مستقبلا وتوصل للربع ودي كأس العالم. المهم بدات المسيرة.
لكن فهاد المشاركة كانو انتهازيين استغلوها. ما كيعرفو يلعبو. ما كيعرفو يشجعو. انتاحلو صفة صحافيين وصحافيات هما ديك “الفرقة” اللي عطاتها “دوزيم” برنامج قاليك “ديڤيرتيسمون” الساعة دارو الفقصة وصافي.
“دوزيم” القناة العمومية سمحات فخدمتها كقناة عمومية وقلباتها تفاهة مع داك سعد عبيد والطبيب التافه عبيد والممثلة الضعيفة هند جبارة وديك اللي ما كتعرف دير والو مريم القدميري.
لو هادو دارو تخربيقة ديالهم فوسائل التواصل الاجتماعي ما عند حق حتى واحد ينتاقدهم. اللي عجبوه يشوفهم واللي ما عجبوهش ما يشوفهم ومريضنا ما مشى معاه باس. هادو دازو فقناة عمومية وفترة الذروة بين المسلسل التركي ونشرة الاخبار ومع ذلك ما جابوش نسبة تحمر لوجه. هادو جاو لقناة عمومية وما داروش الديڤيرتيسمون حقاش ضعاف فهاد الدومين وتلاحو على الصحافة وطبعا كانو اكثر ضعف.
هادو انتحالو صفة صحافي. كانت تصرفاتهم مع الصحافيين بصاح ف”دوزيم” اللي كانو فاستراليا حقيرة ومنحطة. سبو “شوف تيفي” وقدمو ريوسهم باللي هما اللي كيديرو الصحافة واخا منتاحلي هاد الصفة. دعماتهم شركة “انوي” للاتصالات فهاد التفاهة. بان توجهها الداعم للتفاهة. شركة باغية تدعم الكورة گاليك٬ مشات لهاد التخربيق.
اليوم خاص المحاسبة. اللي خاصو يتحاسب هي ادارة “دوزيم”. خاص محاسبتهم فالبرلمان على هاد التخربيق. بلا حساب غادي يرتاكبو فضايح اكثر هاد العينة من بنادم. سؤال حزب التقدم والاشتراكية على الصحافيين المزيفين اللي خداو اعتماد باسم الفيفا غير كافي. خاص سؤال فالبرلمان واحضار فيصل لعرايشي باعتبارو الباطرون لكبير ل”دوزيم” ويجيب معاه مدير دوزيم سليم الشيخ. اش من قناة عمومية بغينا وشكون كيدير خدمة الصحافي؟ بشحال هاد الشي وعلاش تعطى المارشي لشركة سعد عبيد. شكون هاد عبيد وشكون كيدعمو. اسئلة كثيرة خاصها تطرح بعد ما سالى المونديال
Laisser un commentaire