كود هناء ابو علي الرباط ///
اللي يستاحق رجل المرحلة فالاعلام العمومي اليوم هو فؤاد عارف مدير عام وكالة المغرب العربي للانباء. هادا يالله تعين اخيرا بعد وفاة المدير الراحل خليل الهاشمي الادريسي. علاش يستاحق هاد اللقب؟ حقاش هاد العبقري دار نباقص وهو وكالة انباء من حدث كبير اللي هو مونديال استراليا نيوزلندا للسيدات اللي شارك فيه المنتخب المغربي وتأهل للثمن. حدث كبير فتاريخ كرة القدم النسائية.
هاد الكورة كيدعمها رئيس الدولة كيف قال مدرب المنتخب رينالد بيدروس وعدد من اللعابات فندوات صحافية تماك وما حضراتش لتغطيتها “لاماب”. رياضة كيدعمها رئيس الدولة وكتقاطعها ادارة فؤاد عريف.
لفضيحة ان لاماب دارت تغطية مزيانة لمونديال قطر باش كان الراحل خليل الهاشمي مدير عام. كانو المقالات وكانت الصور وكان الفيديو والحوارات المصورة. يعني الوكالة عندها الموارد البشرية اللي قادرة دير تغطية مهنية فمستوى كبير. لكن هاد الكفاءات كتحارب اليوم.
السي المدير العام دخل فحروب. مدراء ولاو مريحين فالقهاوي بلا مهمة. علاش؟ هادو ما دعموهش باش قرر الراحل خليل الهاشمي يدخلو من واشنطن للرباط ويولي صحافي. ما رضاش ومشى عند سفيرة المغرب فواشنطن وطلب اكثر من جهة باش يبقى فواشنطن وياخد عام ساباتيك. فاللخر كلشي فشل ليه رسلوه للخارجية عبد ناصر بوريطة اللي وظفو فحربو الغبية ضد الراحل خليل الهاشمي. هادي قصة اخرى.
المهم بقى فقلب هاد المدير الجديد غل. قرر ينتاقم من كل واحد كان مع المدير الراحل. قرر يتخلى علي اطر كفءة. الدولة كلها كتشوف تصرفاتو اليوم. جهات فالدولة دعماتو وبزاف. دابا مصدومة من تصرفاتو.
دخل عارف فحروب داخلية لاسباب شخصية ماشي مهنية. هاد الحروب خلاتو يضيع حدث كبير بحال مونديال استراليا للسيدات.
دابا هادوك اللي جابوه ودعموه غادي يكونو فرحانين بتغطيتو عن بعد. فرحانين باللي اختار توجه ضد توجه رئيس الدولة. برافو عليه وبرافو اكثر على اللي دعموه
Laisser un commentaire