كود هناء ابو علي ///
علمت “كود” ان كل من مسؤولين فالماركوتينگ بالادارة العامة لشركة “انوي” وبلا ما يخبرو مديرهم العام٬ واحد مدراء “دوزيم” طلبو من سعد عبيد منتحل الصفات مول صفقة “الفرقة” فمونديال استراليا للعيالات٬ يدعي “كود”. حسب مصادر “كود” فكل من “انوي” و”دوزيم” ما عجبهمش الانتقادات للي دارتها “كود” لهاديك الفرقة اللي خدات مارشي باش دوز فقناة عمومية وتنتاحل صفة “صحافي”٬ وطلبو منو يتصل بمحامي فكازا ويقدم شكاية ضد “كود”.
حنا عاجبنا الحال. فالمحاكمة مزيان تجي الادارة العامة ل”دوزيم” تشرح للقضاء الصفة اللي مشاو بيها وانتحالهم للصفة وكيفاش خداو المارشي وعلاقتهم بشي مسؤولين تماك فالقناة وعلاش خلصو على شي مسؤول عندهم. مزيان تجي ادارة “انوي” تشرح علاش دعمات هاد التخربيقة ديال الفرقة” وشحال عطاتهم واش هي الطريقة اللي تافقات فيها مع “دوزيم”
مزيان هاد المحاكمة اللي نتمناوها تكون قريبة بعد ما توجد لسعد عبيد ادارة “دوزيم” و”انوي” كاع المعطيات باش تحطها٬ حتى المحامي غاديين يختاروه ليه.
“كود” غادية تبقى تفضح هاد العينة من متنحلي صفة الصحافي. تنتاقد اللي كياخدو المارشيات بلا ابيل دوفر ولا مولاي بيه. فهاد القضية كاين حوايج خراين غاديين يبانو.
كنتسناو فسعد ووراه “دوزيم” و”انوي” لهاد المحاكمة بفراغ الصبر.