فين والي جهة الداخلة؟ فين رئيس الجهة؟ وا باراكة من التخبية وواجهو مشكلة نزوح شباب المنطقة راه المتربصين كيساينو فرصة

الوالي الزاز -كود- العيون///
[email protected]

أحداث متسارعة كتشهدها الداخلة منذ الساعات الأولى لليوم الجمعة، بسباب نزوح العشرات من شباب المنكقة محو معبر الگرگرات بغاو يغادرو التراب الوطني من بعدما تم التنصل من الاتفاق لي وصلو ليه الجهات المختصة معاهم فاش كانوا معتاصمين عشرات الأسابيع حدا مقر مندوبية الصيد البحري فالداخلة قبل نحو ثمانية أشهر.

هاد الشباب قرر أنه يصعد وينزح نحو معبر الگرگرات بعدما ملو من المماطلة فتفعيل الاتفاق لي دارو مع الجهات ولي فيه أنه 350 قارب غادي يتم الترخيص ليهم باش يصيدو فقرية الصيد “العين البيضا” حدا الداخلة ويوقفو أشكالهم الإحتجاجية وهادشي لي وقع بالفعل.

فخضم هاد الإحتجاج وإقدام المعنيين بالأمر على محاولة مغادرة التراب الوطني ومنعهم من طرف عناصر الدرك الملكي، وفبحال هاد المشاكل لي كتوقع وكتكون ذات طابع سوسيو إقتصادي كيخرجو لينا الماربصين لي كيحولو الملف المطلبي لكل إحتجاج إلى ملف مطلبي سياسي، فهاد الخالة خاص والي جهة الداخلة لمين بنعمر ورئيس جهة الداخلة الخطاط ينجا يدخلو على الخط ويحلو المشكل ويواحهو هاد الشباب وجها لوجه.

اولا لمين بنعمر هو ممثل جلالة الملك المسؤول الاول فالجهة، وثانيا الخطاط ينجا هو رئيس الجهة ممثل الساكنة، هاد الناس خاصهم يتحلاو بالشجاعة وما يتخباوش ويبذلو مجهود باش يلقاو حل ويجيدو لينا بالفعل أن جهة الداخلة غادي فالتنمية وماشي غير فتنمية الحجر بل حتى فتنمية الإنسان.

شباب المنطقة كيعاني أشهر هادي ما عندو حتى دخل من بعد ما وقفوهم عن ممارسة نشاط الصيد البحري وعائلاتهم ما بقا عندها معيل والناس لي كارية ما لقاتش باش تخلص الكراء ومعرضة للكردفأي لحظة، راه ما يمكنش نقتاصرو على دعم الخطوط الجوية والإفاقيات الخاوية وندعمو شي وحدين بحال ليلى اوعشي وغيرها ونخليو شباب المنطقة. باراكة من التخبية وشوفو عاد الناس شنو عندهم وعالجو مشاكلهم الى كنتو بالغعل كتقولو تنمية وكاين إستثمار. صورة الداخلة راه كتهتز وحنا عندنا قنصلية إسرائيلية وأمريكية جاية فالطريق وقنصليات أخرى خدامة كنقولو ليهم حنا دولة غادية فالتنمية.

دابا لو كان شي حدث فالداخلة فيه التصفيق والتهليل والسهرات المسؤولين تلقاهم فالصف الأول، ولكن فاش كيوقع مشكل كيتخباو وكيديرو عين ميكة كل واحد شاد القنت خايف يخرج. وحلو مشكل الشباب أو على الاقل يوقفو إحتجاجهم راه مغادرة التراب الوطني بهاد الطريقة فيها إساءة للدولة وإساءة حتى للمنتخبين لي غادي يؤكدو بالفعل انهم ما ساويين والو وما عندهمش قدرة على التخفيف من التوترات فالشارع العام وخاصة فالداخلة لي كتسنى البوليساريو أي فرصة باش تسجل فيها نقاط علينا.

إقرأ الخبر من مصدره