من الحوايج لي كايخلّيو البيدوفيليا دّوز حسّي مسّي شي مرّات فالمغرب هي ديك القاعيدة ديال بوس عمّك، بوس خالك! الدراري الصغار فالمغرب الجسد ديالهم مستباح! بنادم كايشري ليك بيمو بدرهم و كايقوليك “بوسني باش نعطيه ليك”! خاص الواليدين يعرفو بلي الجسد دالطفل عندو حرمة.. ماشي لي جا يبوسو ولي جا يصرفقو!

سهام البارودي – كود//

واحد صاحبتي ولدات مؤخرا بنيتة زوينة ! و فاش مشيت نشوفها قالت ليا بوسيها و قلت ليها لاّ، مانبوسهاش، مازالة صغيرة على انها تتباس و بالخصوص من الغرباء و بالخصوص من الكبار و لبزَاف د الاسباب من اهمها انه انا الى كنت مريضة بالرواح و لا ليربيس و لا اي ڤيروس او ميكروب راه ساهل بزّاف ندوزو لديك الطفلة ! كاينين اساليب بزاف باش تعبر للطفل على الحب ديالك ليه من غير البوسان !
و لكن هادي انا ! و انا ماكاينش منّي بزّاف لسوء حظ الانسانية ! الاغلبية د المغاربة فيهم هاد القاعيدة الخايبة د البوسان، كايموتو على بوسان الدراري الصغار، يقدر اي واحد جا للسبوع و لا من الجيران و لا فالزنقة ماكاتعرفوش يتحنى ليك على ولدك و يبوسو ! ويتك ويتك على الكتكوت ! و يقرصو من حنكو و يحك ليه على راسو و يلعب ليه بشعرو !

الواليدين براسهم كايشجعو ولادهم انهم يبوسو الغرباء، بوس عمك ! بوسي خالك ! سير عند عمّو يعطيك حلوة ! وا بوسو بوسو … كلشي كايعتابر جسد الطفل مستباح ، كاين گاع لي ماكاتقدهمش ديك البوسة د الحنك كايمد درگومو هاكاك خانز بالگارو و بقايا التقلية للطفل و كايقولو بوسني ! يبوسك حنش بوسكّة يا بوقال !

راه هاد البوسان و التلماس و الاستباحة لي كايديرو لجسد الطفل بحيث انه اي واحد يمكن يجلسو فحجرو و اي واحد يمكن يحك ليه راسو و اي واحد يمكن يبوسو ، هادشي فحد ذاتو كايشجع على البيدوفيليا و كايخربق حتى الدري الصغير فاش كايتعرض لشي اعتداء ماكايعرفش اصلا انه اعتداء حيت بالنسبة ليه كلشي فحال فحال ! كي البوسة د الأم كي البوسة د الجارة كي البوسة د الفقيه !

للأسف الجسد د الطفل راه بوحدو موضوع طويل و كبير خاص بعدا الاسرة تكون واعية بيه قبل مانطالبو انه يتناقش فالمدرسة ! خاص بعدا الواليدين يكونو واعيين بالخطر، يكونو واعيين بالجريمة لي كايديرو فاش كايشجعو ولدهم يبوس الغرباء و يسلم عليهم و يخليهم يقيسو فيه ! راك كاتوجد ولدك و لا بنتك باش يكون فريسة سهلة للبيدوفيل !

شي عاقيسات كاتقوليك “لاَ الصواب ! ويلي حشومة خاصو يسلّم على جدّو ! يسلّم على الجيران ! يسلّم على مول الحانوت” واش كاين غير البوسان فالتسلام ؟ ماكايناش الهضرة ماكاينينش اليدين ؟!  بزاف د المكلخين و المكلخات تحت مسمَى العادات و التقاليد و الصواب كايبقاو يدورو يدورو تايلقاو ولدهم ضحية دشي فقيه و لا شي مؤطر و لا شي جار و لا شي حد من العائلة نيت …. البيدوفيليا ماخطات حتى شي قنت !

إقرأ الخبر من مصدره