الصراحة عجبني الغليمي فاش شطَب الأرض بداك السواديزون داعية ياسين العمري ! بان قدَامو صغير بزّاف و ضغيف بزّاف فحال بزّاف د الدعاة لي فراس مالهم غي القفشات و النكت الحامضة و حاطّين على المرأة ! عمل المرأة، حجاب المرأة، اختاه ماتلبسيش القصير، اختاه ماتخدميش! وا جاوب آ المجتهد و لا كاتعرف تحگر غا على الشيخات!

سهام البارودي – كود//

ياسين العمري بقا غا كايتفتف فديك المكالمة مع الغليمي ! هاد الاخير سولو سؤال بسيط ” عطيني دليل واحد على انه النبي محمد تكلّم مع الله “، سؤال بسيط جدا و ناقشوه بزّاف ديال العلماء من قبل و كان ممكن ياسين العمري يقدم ليه بزّاف د الاجوبة و لكن مالقا مايقدّم ! بقا غا كايتعصب و يكشكش و يتهرّب من الجواب !

ياسين العمري فحال بزّاف ديال السواديزون “دعاة” الادسنس ! ماعندو لا علم بالدّين لا علم بالدنيا داكشي علاش يمكن اي واحد فحال الغليمي يفرشخو بسؤال بسيط ! حيت راس مالو هوا بعض القفشات و النكت الحامضة لي كايجر بيها الشحيمة لدوك الهبّال لي متبعينو و طبعا الموضوع المفضّل ديال اي واحد تلفات ليه الجرية = المرأة ! وظيفة المرأة، عمل المرأة، لباس المرأة، حزقة المرأة! اختاه ماتلبسيش القصير، اختاه ماديريش البارفان، اختاه موتي … كايعرفو يحگرو غا على العيالات ! الموضوع الساهل و الشيّق و لي كايلقا اهتمام من بزّاف د الكفّاتة الحاقدين على المرأة لي من نهار خرجو منو ماشافوه !

باش تعرف بلي حتى النيڤو ديال النقاش كايفتاقدوه هاد الدعاة الجدد، مشات ديك الوقت لي كانت ارض الاسلام كايتناقشو فيها مواضيع فلسفية … ايه فاللخر كايقتلو المفكرين و كاينعتوهم بالزندقة و لكن اوموان كان واحد النقاش!
دابا الدّين تلاّت بيه تا ولاّ يدافع عليه فحال ياسين العمري لي نقاش بسيط ماقدرش يعطي فيه ! نقاش بسيط و سؤال بسيط ماقدرش يقدم ليه حتى جواب!

إقرأ الخبر من مصدره