بنادم كاتقولّيه حيد الكروسة ديالك من الشارع راه هادي جريمة سميتها احتلال الملك العمومي كايقوليك “واش كانبيع القرقوبي، ياك باغي نجيبها بالحلال” هنا كاتعرف بلي الدماغ د المغربي مخوّر ماعارف واش يتبع القانون و لا يتبع الفلسفة ديال الحلال و الحرام و هادشي طبعا جاي من الدولة لي ماواضحاش تاهي !

سهام البارودي – كود//

الدولة نورمالمون راها كاتبنى على القانون الوضعي و لا على منطق الحلال و الحرام و لكن مايمكنتش تبنى عليهم بجوج ! فالمغرب الدولة ماواضحاش ، ما هي دولة دينية ميا فلميا ما دولة علمانية ميا فلميا! و هادشي كايخلي بزاف د المغاربة تالفين بين منطق الحلال و الحرام و منطق القانوني و اللاقانوني ! و حيت الحلال و الحرام  جاي من عند الله و ساهل بزّاف و ماكايطلبش منك تكون قاري و عندك باك بليس سانك راه الناس كايعقلو عليه اكثر ! و هادشي كاتشوفو فالتصرفّات د عباد الله!

الحلال و الحرام كايخربق النّاس، شحال من واحد حاط كروسة فالزنقة و لا فرّاشة ، معرقل السير و مصدّع الجيران و موسخ الارض و فاش كايجيو المخازنية يجريو عليه كايتعصّب و كايبدا يشكي على عباد الله ” واش انا داير شي حاجة د العيب ؟ ياك كانجيبها حلال ! الحلال يا رسول الله ” ماكايفهمش علاش الدولة كاتحاربو و هوا ماكايدير غي الحلال ! و مادام كايدير شي حاجة حلال راه كايشوف بلّي من حقو يحط ليك الكروسة حدا باب الدّار ! مالها شنو فيها ؟! واش بغيتيه يمشي يگريسي ؟ يدير شي حاجة حرام ؟!

و هادشي راه جاي من الدولة براسها لي ماواضحاش ! دولة لّي باغا تبني ايماج ديال دولة حداثية عندها التيجيڤي و الموروكومول و الطرامواي و المدونّة فحال شي دولة حداثية و فنفس الوقت كاتعاقب على الافطار العلني و الجنس خارج الزواج و المثلية فحالا عايشين فالقرن الاول الهجري ! هنا فين وحلات الفگوسة او كيما كايقولو بالعربية وقف حمار الشيخ في العقبة !

لذلك فاش كايجي شي مول الكروسة يغوت ” واش انا كانبيع الحرام ؟” راه حيت الدولة ماعمرها ماقالت ليه بوضوح و شجاعة شوف ا سيموحمد ! راه كاينة شي حاجة سميتها القانون لي كايأطر الحياة د المغاربة ! و ديك الهضرة د الحلال و الحرام خلّيها تاتكون جالس على شي براد ديال اتاي نتا و صحابك فالعشية ! و لكن لمّن غاتقولها ؟! تقولها لشي حد تولي ضاسر و زنديق و شبعتي خبز! الشعب عندنا ماكايبغيش الوضوح!

إقرأ الخبر من مصدره