كود هند لكلاوي ///
حاتم عمور باغي يكون مغني كبير. غير هو غادي يبقى صغير. حجمو بان فالاغنية التافهة “يوم ماشي عادي”. بانتهازيتو دارها فعيد الشباب فذكراه 60 واختار ف30 ثانية قبل ما تبدى الاغنية يدير ديديكاس للملك. قال فيه باللي بكل فخر واعتزاز كيشرفو هو يتقدم لمحمد السادس. طبعا هو زاد جلالة ونصره الله٬ ما اعتبرو هو “العمل الفني كهدية تهنئة متواضعة للمقام العالي بالله”.فهاد الاهداء بان طابعو الموغل فالتقليدانية. عبارات ماشي ديال الوقت “العافية والتمكين” و”خادم الاعتاب الشريفة”.
كون فنان ذكي كان يختار كلمات اذكى ديال اليوم. ياك باغي يوصلها للشباب٬ راه هاد اللغة كيكروها الشباب.
على مستوى المبدأ٬ اصدار اغنية على الملك فعيد الشباب او العرش غير تعياشيت. رئيس الدولة باش بدا الحكم سالي مع هاد التخربيق. جاو شي عياشة وحاولو ولكن كلشي فشل. مزيان بعدا باش فشلو. عقلتو على شي عنزي كويتي حتى هو دار شي تخربيقة. شكون باقي اليوم عاقل حتى على اسمها.
على مستوى الشكل. واش الاهداء تقريبا طول من الاغنية اللي فيها لازمة وجوجت التخربيقات كتسمى كلمات. واش الخيال عند كاتب هاد الكلمات وصل لهاد العجز. ما لقى غير “هادا يوم ماشي عادي. عيد ميلاد ملك بلادي”. وشي تخربيق ديال انت اعز لحباب يا حبيبنا الغالي” و”تاريخ محفور فقلوبنا يوم ميلاد ملكنا وسيدنا”.
الطريقة ديال يغني ويجيب اطفال وفئات عمرية كبيرة تردد معاه هاد التخربيق ما كان عندو حتى اثر.
الكارثة ايلى كانت وزارة الشباب والثقافة مخلصة هاد التخربيقة. سيدهم عمور داير اهداء خاص للوزارة. ما غاديش يديرو فابور. هادا موضوع اخر نرجعو ليه من بعد
ايلى كان فنان كيقول باللي عزيز عليه رئيس الدولة بصاح٬ راه مطلوب منو حاجة وحدة هو يدير خدمة مزيانة. يكون فنان بصاح فالدومين ديالو ويبعد على التعياشيت وهاد العينة من الاغاني اللي رئيس الدولة براسو وقفها
Laisser un commentaire