سهام البارودي – كود//
مؤخرا نتاشرات واحد الصورة د شي عيالات مساكن فشي دوار هازين الياجور و قاليك طالعين بيه لشي جبل باش يبنيو الجامع ! فحال گاع الدواور فالمغرب كاتلقاهم خاصهم كلشي، المدرسة، السبيطار، المعدات الطبية، المقررات المدرسية ، شي مرات تا الگراصن ماعندهمش ولكن الجّامع هوا الاول ! طبعا ! شنو غاتقوليهم لا ؟! تولّي كافر و مرتد و ملحد ! ايوا بنيو ! بنيو الجوامع و دعيو فيهم الله باش يكونو عندكم المدارس و السبيطار و الطريق مزفتَة باش ماتبقاش غي حياتكم بوحدها لي مزفّتة هاد الساعة!
ماعلينا ! التصويرة د العيالات نتاشرات فالصفحات و ماكاين غي المديح و التصفيقات و هادو هوما العيالات المغربيات الحرّات، و هادو هوما اللبؤات الحقيقيات و شي هضرة و شي نفاق يا خويا !!
تما فين كاتشوف بلي شي وحدين عزيز عليهم يشوفو المرا مقهورة، اه ! خاصها تكون مجرتلة ، و مكرفصة، و لابسة الدرابل و باين عليها الفقر و سوء التغذية و هازة الثقل فوق ظهرها عاد كاتسمى مرا مغربية حرة ! مرا مغربية حقيقية ! فحالا خاليدة عزبان و مريم بنصالح و مريم شديد و الرياضيات و الفنانات و الطبيبات و الاستاذات و الموظفات لي كل وحدة كاتعاون فيهم الوطن ديالها بشي حاجة ماشي مغربيات حقيقيات ! الطابع ديال التامغرابيت باش يعطيوه ليك و تعجبيهم خاصك تكوني وجهك محروگ بالشموش و مكمشة و لابسة شي صندالة ظفارك شبعانين شومبينيون ! تما كاتبان ليهم المرأة الحقيقية و الام الحقيقية و المغربية الحقيقية ! و هادشي علاش كاتلقاهم هوما نفسهم لي ضد عمل المرأة !
ايوا غا سيرو تخراو من عندي انا بعدا ! هههههه ! انا ماكرهتش گاع المغربيات من لحدادة للحدادة يكونو مرفحات و مهليات فراسهم و عايشين حياتهم بالطول و بالعرض و لا على الاقل عندهم الاستقلالية المادية لي تخليهم يعيشو كإنسان عندو كيان ماشي تراسة فشي دار ! بلا احلام بلا حياة ! تسافر و تفوج و تكسى و تاكل و تشرب و تشري ليسوان لوجها و تعتاني بالبشرة ديالها و دير ماساج من السيمانة للسيمانة تحيد بيه العيا د الراجل و الدراري! هادشي لي كانتمنى للمغربيات ! و لي بغا ليهم غا الحطب و الحجر و الياجور الله يطليه بيه يبقا يهزو تايتقسم لبوه الظهر على جوج يا ربي آمين! قولو آمين !
Laisser un commentaire