السياحة كتروج القنت وفيها الصرف ولكن كتذل وفاش شي منطقة كتولي سياحية كتكثر فيها مظاهر السعاية والغش وتاشفارت وكتطغى عليها اخلاق جامع لفنا، أنك تشوف برهوش كيطلب لما وطبعا الجالية هوما اكثر وحدين كيوقفوا لهاد البراهش، حيت عزيز عليهم يشوفوا المغاربة عطشانين وجيعانين ويعاونوهم

محمد سقراط -كود///

آخر منطقة كنت كنتوقع أنني نشوف ولادها كيسعاو ويطالو جنب الشانطي هي بليونش، أول ماشفت هاد الظاهرة كانت في الاطلس بين افورار وبين الويدان ، أطفال صغار واقفين جنب الطريق في الخلا وكيديرو إشارة ديال انهم باغيين لما فقط وطبعا المشهد كان مثير للتعاطف كيغلبك وكتوقف وتعطيهم لما وتدور معاهم والى عندك شي حاجة ديال الماكلة تعطيها ليهم، شوية تكرر المشهد في طريق شلالا اوزود وهاد المرة أطفال جنب ديورهم حتى هوما كيشيرو بحال الى فيهم لعطش في منطقة كلها عيون وجنب ديورهم أصلا، من بعد شفت هاد الطريقة كتكرر في اغلب المناطق من عيون ام ربيع حتى للرشيدية وتينغير والنواحي وماشي حكر على الأطفال كتلقى حتى الرعاة كبار في العمر وكيديروها زعمة راه قريب يموتوا بالعطش جنب الطريق، وهو في الحقيقية مكاينش شي سارح كيرعى الغنم ماهازش معاه لما والمونة في القراب وماشي قريب من شي مصدر مائي لي كيورد منو الغنم.

في بداية الالفينات كنت كنبيع ونشري في الأسواق المحيطة بمدينة طنجة بحال القصر الصغير وتاغرامت وكاستييخو وخميس لنجرة مرة مرة وعدة مناطق أخرى، وبالنسبة ليا جبالة ديال المنطقة بين القصر الصغير حتى للرينكون من أظرف الناس واكثرهم خلقا وكرما ومروءة وعزة نفس وصدق، في الوقت لي طنجة كانت غارقة في السرقة والاجرام كانت تاغرامت او القصر صغير يمكن تخلي فيهم سلعتك وتمشي تغدى ومكاينش لي يآذي شي حاجة، السرقة كانت منعدمة ومايساومك إلا الى كان شاري، والشطارة قليلة كانت عندهم، وحتى كاستييخو لي كان مدينة الاجرام بكل انواعه فاش كيهبطو جبالة ديال بليونش كتزهى قمة المعقول والصدق غير تسمع شحال هادي الخالات عرف راسك مع ولد المنطقة، والسعاية آخر حاجة كانت فيهم لانهم كانوا مروجين مع الديوانة والتهريب والزطلة والحراگة البرهوش اللخر كيفيق حتى ل12 ويهبط يجيب خمسمية درهم من الديوانة ويجي.

السياحة كتروج القنت وفيها الصرف ولكن كتذل وفاش كتعرف شي منطقة وتولي سياحية كتكثر فيها مظاهر السعاية والغش وتاشفارت والقوادة وتاشكامت وكتطغى عليها اخلاق جامع لفنا، أنك تشوف برهوش من منطقة كلها عيون ديال لما وواقف أصلا حدا سقاية وكيشير للناس بإشارة انه فيه العطش، وطبعا الجالية هوما اكثر وحدين كيوقفوا لهاد البراهش، حيت عزيز عليهم يشوفوا المغاربة عطشانين وجيعانين ويعاونوهم ، وبزاف ديال الناس مبقاش عندهم موشكيل ان ولادهم يديرو هادشي، برهوش يخرج للشانطي ويجيب معاه الفلوس وحاجات بلا مايسولوه واليديه منين جاك هادشي ومنين دبرتي فيه وكيفاش وعلاش، مادام ان واليدين هاد الأطفال كيستغلوهم خاص الدولة تتدخل وتعاقب الإباء لأنهم كيخرضو ولادهم على السعاية ونهار يتگبض بيهم شي بيدوفيل وهادي واردة جدا كتلقى الإباء هوما اللولين كيديرو تنازل مقابل جوج فرنك وهادي حتى هي كارثة وهنا راه غادين باش يتحول المغرب لجامع لفنى كبير وصافي.

إقرأ الخبر من مصدره