سهام البارودي- كود//
ميريكان حيت عندها صناعة سينيمائية قوية بزّاف كاين فيها بزاف د الآباء كايدفعو ولادهم صغار للتمثيل، كايبداو يقلبو ليهم على الاشهارات ديال كيندر و ديال نيسكويك و شي شامبوان د الدراري الصغار و كايدفعوهم يشاركو فمسابقات الجمال و طبعا يدوز الكاستينغات و كايحلمو فالنهار لي ولدهم و لا بنتهم يتعطا ليه دور كبير فالسينيما و لا فالمسرح ! و كاين بزاف د الحالات معروفين د ممثلين بداو صغار و لكن فالغالب الحياة ديال داك الطفل كاتبدل بزّاف ! ماكايبقاش عايش الطفولة ديالو بشكل طبيعي، الشهرة كاتخلق ليه مشاكل فالمدرسة و فالزنقة و فأي بلاصة كايكون فيها و هادشي كاينعاكس عليه نفسيا و فاش كايكبر كايولي عاطيها غا للمخدرات و فالغالب ماكايكمّلش فداك النجاح لي كان عندو و هوا صغير ! هادشي لاماجاهش شي اكتئاب !
هادشي طبعا ماعارفينوش بزاف د الواليدين فالمغرب لي كايدفعو ولادهم للسوشل ميديا و هوما فرحانين كايشوفو الحياة الشخصية ديالهم و ديال ولادهم متاحة للجميع فحال آية سطار ! ضروري غاتكون مها و باها فرحانين بفلوس اليوتوب و الفايسبوك و كايمشيو يتقداو بيهم الماعن و الماكلة من بيم و لكن حتى شي واحد فيهم ماكايفكر فالطفولة دديك البنت ! فكيفاش غاتعيش فالمستقبل، كلشي كايعرف آية سطار، شنو كاتاكل، شنو كاتشرب، كيفاش عايشة، شنو شرات ، حتى من الخلافات العائلية، آية سطار ولات كادخل فيهم و تعاير مع عائلة بّاها بالڤيديوات فالفايسبوك، شوفو على جهل كي داير ؟ دابا الام ديالها ماواعياش بشي حاجة سميتها الحياة الخاصة ! مافراسهاش بلي بهادشي لي كادير مع بنتها راها كاتجني ليها على المستقبل ديالها !
لنفرض هاد آية كبرات و بغات تولي قايدة ؟ و لا كوميسيرة ؟ و لا استاذة جامعية و لا فالهيئة الديبلوماسية و لا بغات تخدم فشي وظيفة حساسة كيفاش غادير ليها و هي مشوهة فگاع وسائل التواصل الاجتماعي ؟ ڤيديواتها كاتعاطى مع عائلتها منتاشرين فاليوتوب ؟ كيفاش ؟
و لا لنفرض كبرات و بغات تعيش حياة عادية بعيدة عن الاضواء، تمشي للحمام فخاطرها و تقدى فخاطرها و تجوج فخاطرها كيفاش غاتعيش هادشي و هي المغرب كامل كايعرفها ؟ صافي طرو طار ديك الساعة الڤيديوات ديالها فالفايسبوك و اليوتوب غايبقاو الى يوم يبعثون !
للأسف الفقر و الجهل كايعمي بزاف د الواليدين على واحد الحاجة مهمة بزاف سميتها الخصوصية ! دابا مّت آية لادويتي معاها غاتقوليك هي كايعجبها دير الفيديوات ! و راها كاتقرى مزيان ! زعما ماكايأثروش عليها ! لا آ لالة كايأثرو عليها و غايأثرو عليها اكثر فالمستقبل و دوك فلوس الفايسبوك ماغاديش ينفعوها ديك الساعة حيت غاتكون كبرات انسانة غير سوية نفسيا ماعاشتش طفولة طبيعية !