و الله الى جالسة كانتفرج فأوبنهايمر و كانقول مع راسي وا شوف هاد النّاس شحال هاربين علينا من فوقاش وهوما كايناقشو النووي والقنبلة الهيدروجينية والفيزيك والماط! حنا ف2023 مازال واحلين مع رباعة دالارهابيين باغيين يطبقو الحد على الغليمي حيت قاس ليهم صنم من الاصنام ديالهم ! واش تا العمري ولا مقدس ولا كيفاش ؟!

سهام البارودي – كود//

والله جالسة ديك النهار فالسينيما كانتفرج فأوبنهايمر وانا نلقى راسي ساهية كانفكّر، كانقول مع راسي شوف هاد الناس من فوقاش و هوما كايناقشو الفيزيك و الماط و القنبلة النووية و القنبلة الهيدروجينية، شوف من فوقاش و هوما عاطيين قيمة للعلم و العلماء ( العلماء د بصح ماشي علماء الضراط) ، ناس مدخلين العلم فحياتهم كاملة، فالطب، فالادوية، فالعلوم الانسانية، و حتى فالحروب العلم حاضر ! باش تعرف الاهمية د العلم في بناء الحضارة الانسانية.

فاش كان بنادم عندنا مازال ماكايلبسش الگرصون، كانو الناس فميريكان و اوروبا كايناقشو النووي! و حنا اليوم، دابا دابا وانا كانكتب هادشي ف2023 واحلين مع شرذمة ديال الارهابيين كايهددو واحد الانسان بالقتل حيت شنو ؟ حيت عيط لواحد الصنم من الاصنام ديالهم و فرش الجهل ديالو ! صافي غا حيت فرشو نوضو قتلوه ! شوف على جهل كي داير آ صاحبي، شوف على هيماج معامن عايشين و لي غاتيبنيو معاك مغرب الغد ! كلمة جوج كايجبد عليك السيف باغي ينحرك ! واش هادي ضسارة ؟ و لا مرض نفسي ؟ و لا اجرام ؟ و لا ارهاب ؟  و لا شنو بالضبط !

و فاش كاتقوليك الدولة راه شدينا شي خلية ارهابية كايخرجو شي طنازة ” وايلي على ارهابية تانتا ؟” و كايكذبو الخبر ! وا راه البذور ديال الخلايا الارهابية عايشين معانا و عندهم قنوات فاليوتوب و فالفايسبوك و صفحات كايدعيو فيها للفكر الظلامي فاص ! ايه ماكايقولوش الذبح و القتل نيشان حيت مطورين و خايفين من المخزن لايخزنهم ! و لكن راه كايدفعو الناس للتشدد و الظلامية و فلداخل ديالهم و الله اما كرهو يتنصبو المشانق فالمدن المغربية كاملة و يبداو يرجمو و يشنقو و يلوحو من شاهق اي واحد اختلف معاهم ! شنو معنيتها واحد داير قناة اختصاصية فالحرب على العيالات ؟ و القراية د العيالات و التوظيف د العيالات في الوقت لي صاحب الجلالة امير المومينين باغي يدفع بالمرا القدام و يعطيها حقوقها ؟ واش ماشي ضسارة كبيرة هادي ؟! شنو معنيتها واحد كايخرج فاص فالصفحة ديالو باش يقوليك بغينا نطبقو حدود الله و نقطعو اليدين و الرجلين من خلاف و نرجمو الزاني ؟ معنيتها انه عندك بذور كاتسنى التربة المناسبة باش تفرگع ليك فوجهك.

راه اي واحد كايصحاب راسو راه احسن من عباد الله كاملين و الشعوب كاملين و غا بوحدو غادي للجنة، و باغي و كايتمنى و ماكرهش يخرج و يلقى گاع المغربيات دايرات الحجاب و الخمار ، اي واحد فلداخل ديالو مقتانع بلي خاصو يغير المنكر و ينصح الناس فالقهاوي و باغي يمنع المهرجانات من المغرب و يسد البيران … اي واحد كايكره الموسيقى و الفن اي واحد كايفكر هاكا راه مشروع ارهابي ! مشروع داعشي غير مازال ماطوّرش، مازال مالقاش البيئة المثالية لي تصنع منو شي ابو قتادة و لا يوسف فكري جديد !

إقرأ الخبر من مصدره