من المؤكد أن الزلزال كون طرا فشي منطقة حضرية في وسط المغرب كنا غادي نشوفو أفلام الرعب وعصابات تتلقى للمساعدات وتبحث وسط الركام على المقتنيات الثمينة، وعمليات سلب ونهب على المباشر، بحال لي كيوقع ديما في أي حادثة كتوقع في الحواضر، لولا سكان الحوز الشرفاء والكرماء لتحول مراكش إلى فاس أخرى مقبرة للتاريخ وللمستقبل

محمد سقراط-كود///

فرق كبير بزاف بين الفيديوات لي وصلونا من إقليم الحوز والفيديوات لي وصلوا من مراكش المدينة، اللولين بانوا فيهم ناس بسطاء قانعين وعندهم عزة نفس وأنفة وكرامة ومطالبهم بسيطة، وراضيين بالمكتاب وكيشكرو كل واحد وصل لعندهم ومد يد المساعدة، بينما التانيين بانوا فيهم ناس باغين يستغلوا الزلزال كإستثمار وبحال الى ربحو ورقة في اللوطو، بسباب الزلزال باغين برطمة لواحد حالا وبدون نقاش عاد نشوفو الصالير الشهري والمعاونة الغير منقطعة الى الابد، ومصروف الولاد وقفة الأب لي مشدود في الحبس ومصاريف البلية هادشي كلو خاص تكفل بيه الدولة حيت صحاب الملاح جاهم الزلزال.

الفيديوات لي تصوروا في منطقة الحوز كلهم يمكن تشوفهم وماغاديش تلقى شي مرة او راجل صوتو زعيق وكيغوت ومهلل ومرعرع، كاين ناس ماتوا ليهم أسرهم كاملة وهدرو بواحد الهدوء والرقي بهر العالم وكولشي تعاطف معاهم، بينما فيديوات الملاح غير كتطلقهم راسك يضرگ بالغوات والتجعويق وبغينا سيدنا يدير وبغيناه يفعل وماشنا والو وخاصنا السكنى وفين غادي ندير هاد الوليدات باهم في الحبس وغير انا لي كنضرب تمارة عليهم، علاه فين كنتي ساكنة أصلا باش ولدتيهم في قصر البديع وراب عليك، كانوا ساكنين في ديور رايبين أصلا، كاريين من عام الفيل بمية درهم ولا ميتين، طبعا الى كانوا برامج لمساعدة دوك الناس وتأهيل دوك الأطفال باش يخرجوا من داك الوسط ويكملوا قرايتهم ويبعدو على الحبس والمشاكل هادي مزيانة، اما مساعدة بشروطهم غادي تبقى نفس العقلية ويتخلق نفس الجو غير في بلاصة خرى وصافي.

المغرب بلاد كبيرة ومتنوعة ومايمكنش تحكم عليها من خلال اخلاق سكان منطقة الحوز أو سكان الملاح بمراكش، غا هو من المؤكد أن الزلزال كون طرا فشي منطقة حضرية في وسط المغرب كنا غادي نشوفو

أفلام الرعب وعصابات تتلقى للمساعدات وتديها، وعصابات تبحث وسط الركام على المقتنيات الثمينة، وعمليات سلب ونهب على المباشر، بحال لي كيوقع ديما في أي حادثة كتوقع في الحواضر، لولا سكان الحوز الشرفاء والكرماء لتحول مراكش إلى فاس أخرى مقبرة للتاريخ وللمستقبل، والله يرحم لي مات منهم .

إقرأ الخبر من مصدره