يوم للتاريخ للحمرا. يدخل ليه ولا يبقى كيتفرج فيه فالمركز الثاني

كود سبور مصطفى الشاذلي ///
الوداد اليوم على موعد مهم مع التاريخ، بالفوز ديالها غتكتب الاسم ديالها فالتاريخ للأبد كأول بطل للنسخة الأولى من دوري السوبر ليغ الإفريقي، أو غادي تكتفي بأنها تكون وصيفة البطل.
الوداد اللي دخلات هاد البطولة بمجموعة لاعبين جداد ومدرب كيدرب لأول مرة فالقارة الإفريقية، استطاعت تدبير مسارها بشكل جيد، مقابلة أولى سهلة نسبيا مع انييمبا، ومقابلة ملغومة مع الترجي ما حسماتها إلا ضربات الجزاء، وذهاب صعب ولكن تحقق فيه الأهم برباح ضد صنداونز.
الآن الوداد على بعد خطوة وحيدة من إحراز لقب مهم بزاف، علاش مهم؟ لأنه كيجي فبداية الموسم وغادي يعطي الوداد دفعة قوية فالمنافسة على البطولات الأخرى وأبرزها دوري أبطال إفريقيا، مهم أيضا، نظرا للقيمة المالية ديالو اللي غادي تنعش خزينة الوداد، ومهم من أجل البريستيج والمكانة د المغرب فالقارة وترسيخ الانتعاشة اللي كتعيشها الكرة المغربية.
المهمة مغاديش تكون سهلة على الوداد، ولكن مغتكونش ساهلة على صنداونز اللي باقي مكيعرفش يربح المقابلات اللي كيسيطر عليها، عكس الوداد اللي عندو قدرة ديال شخصية البطل كتخليه يحسم المقابلات ولو يكون الأداء ماشي فالمستوى.
للوداد عامل مهم أيضا، كيعطيه حظوظ على حساب صنداونز، وهو الحارس يوسف مطيع، اللي في حال وصلات المقابلة لضربات الجزاء فمن المرجح الوداد هي اللي غادي تربح الكأس، قدرته على صد ضربات الجزاء، وضعف الحارس فالجهة المقابلة لصنداونز ويليامز، كيخلي الوداد أكثر ترشيحا لإحراز الكأس.
مقابلة اليوم هي للتاريخ، والوداد قادرة تدخل للتاريخ بمدرب شاب ومجموعة متكاملة.

إقرأ الخبر من مصدره